מיט בלויז פינף וואכן פארבליבן, גרייטן זיך אלפי תלמידי וחסידי סאטמאר צו מיטהאלטן די היסטארישע שמחה הרוממה במעון הקודש פון כ"ק אדמו"ר מסאטמאר שליט"א, ווען דער רבי וועט אין א מזל'דיגע שעה באשיינען על שמחתו, ביי די שמחת החתונה פונעם ערשטן אור אייניקל, ודור רביעי ישובו הנה.
די חתונה איז באשטימט אויף דאנערשטאג פרשת וישלח אור ליום ט"ז כסלו, ווען עס וועט בשעה טובה ומוצלחת אריינקומען בברית הנישואין נכדתו הבכירה ביים רבי'ן, עלטסטע אייניקל ביי בנו הגדול הגה"צ אבד"ק סאטמאר וומס"ב שליט"א, און עלטסטע אור אייניקל ביי זיין שווער הגה"צ גאב"ד סאטמאר ב"פ שליט"א. די כלה א טאכטער פון זיין איידעם הרה"ג ר' יואל גלאנץ שליט"א מו"ץ בק"ק סאטמאר וומס"ב, זון פון הגה"צ ר' יחזקאל גלאנץ שליט"א מבארדיוב, מיט די חתן א זון פון הרה"ג ר' יעקב שלמה פאנעט שליט"א רב דקהל שערי תפילה אין קרית יואל, זון פון כ"ק אדמו"ר מקארלסבורג מאנטריאל שליט"א, און איידעם ביי הגה"צ ר' יהושע העשיל וואגשאהל שליט"א אבד"ק יאסלא, אור אייניקל פון הגה"צ ר' מנשה מאיער שליט"א גאב"ד גרינוויל דזשערזי סיטי.
שוין לאנגע חדשים וואס די טעטיגע עסקני הקהילה זענען פארנומען אויסצוארבעטן אלע דעטאלן פון די חתונה המפוארה, זוכנדיג נאך א פאסיג ארט וואס זאל קענען ארייננעמען דעם רבבות חסידי סאטמאר צום דעם פרייליכן חגיגה, אצינד איז באשטעטיגט געווארן אז די גרויסע חתונה וועט געפראוועט ווערן איינגעטיילט אין צוויי גרויסע לאקאציעס, די ערשטע חלק אינעם היכל ביהמ"ד הגדול דקהל יטב לב ד'סאטמאר אויף הופפער סטריט אין וויליאמסבורג, און דערנאך וועט די שמחת החתונה פארזעצן אין די גיגאנטישע געביידע פון די דאגגעל גרינהאוז קאמפלעקס אין די נעיווי יארד.
די גיגאנטישע זאל געפונט זיך א שפאן אוועק פונעם בנין ביהמ"ד הגדול, און ווערט צוגערישט מיט די מאקסימום פלעצער צו קענען ארייננעמען די צענדליגע טויזענטער חסידים צום המשך החתונה, אנגעהויבן פון די לעבעדיגע ריקודין און די געהויבענע מצוה טאנץ.
