בביתו נאוה קודש פון כ"ק אדמו"ר מסאטמאר שליט"א איז דעם דאנערשטאג נאכמיטאג פארגעקומען א באשיידענע מעמד התמנות און מסיבת לחיים, ווען דער רבי שליט"א האט אויפגענומען בנו חביבו ויקירו הגה"צ ר' אהרן טייטלבוים שליט"א, לכהן פאר אלס רב ואב"ד אין די בליענדע סאטמארע שטאט "קרית יטב לב" אין בלומינגבורג.
דער רב שליט"א וועלכער דינט אלס מרביץ תורה אין די סאטמארע ישיבה, און איז אן איידעם ביי הגה"צ אבד"ק ניימארק שליט"א, איז שוין א לענגערע תקופה אקטיוו צו באגלייטן די קהילה און אלע שטאטישע אנגעלעגנהייטן אין קרית יטב לב, זייענדיג שטארק אריינגעטון בעובי הקורה ארויסצוהעלפן די בליה און וואוקס אויף אלע זייטן, און האט שוין מערערע מאל געפראוועט שבתים און ימים טובים בקרב תושבי העיר.
אצינד איז אין א מזל'דיגע שעה אנגעקומען די פרייליכע מאמענט ווען דער רבי שליט"א האט אויפגענומען און מכתיר געווען בנו חביבו דער רב שליט"א לכהן פאר אלס רב ואב"ד אין קרית יטב לב, צום איבערגיסנדן פרייד ביי די הונדערטער תושבי העיר וחברי הקהילה.
ביים מעמד התמנות און מסיבת לחיים בביתו נאוה קודש פון כ"ק אדמו"ר מסאטמאר שליט"א, מיט די באטייליגונג פון די ראשי הקהילה והמוסדות, סיי פון וויליאמסבורג און סיי פון קרית יטב לב, אינאיינעם מיט טעטיגע עסקנים און תושבי העיר פון קרית יטב לב, האט דער רבי שליט"א משמיע געווען קורצע דברות קודש, אזוי אויך האט מען געהערט א דרשה פונעם נייעם רב, און פון זיין שווער הגה"צ ניימארקער רב שליט"א.
לויטן פלאן וועט דער רב שליט"א זיך עמטליך אריבערציען קיין קרית יטב לב צום קומענדיגן יאר תשפ"ז, און דאן וועט געפייערט ווערן א גרויסארטיגע מעמד הכתרה ברוב עם הדרת מלך.
