א שרעק איז אנטשטאנען אין די פריערדיגע מינוטן אינעם גיגאנטישן ניו יארק סטעיט ארמארי אין ברוקלין, וואו עס ווערט געפייערט די גרויסארטיגע חגיגה סיום הרמב"ם העולמי במקהלות אלפי ישראל, וואו כ"ק אדמו"ר מצאנז קלויזענבורג שליט"א איז מכובד געווארן אויפצוטרעטן מיטן צענטראלע דרשה לכבוד התורה ולומדיה.
דער רבי שליט"א האט אנגעהויבן די לענגערע דברות קודש בקול חוצב און מאריך געווען בפלפול ואגדה, אינמיטן האט זיך דער רבי אנגעהויבן נישט גוט שפירן, און קורצליך דערויף פלוצלינג צוזאמגעפאלן בפני קהל ועדה, שאפנדיג א בהלה און שרעק ביי די טויזענטער פארזאמלטע, ווען די הצלה לייט זענען אלארמירט געווארן צום אויבן אן.
נאך עטליכע אנגעצויגענע מינוטן האבן די הצלה לייט ב"ה באוויזן צו סטאביליזירן דעם מצב, און דער רבי האט זיך עטוואס בארואיגט צוריקצוקומען צו די כוחות. דער רבי איז צוריק ערשינען אויפן אויבן אן צו באשיינען די מעמד, צום פרייד פון די טויזענטער באטייליגטע, ווען דער יושב ראש האט געוואונטשן א רפואה שלימה פארן רבי'ן בבריות גופא ונהורא מעליא.
