א שרעקליכע עראפלאן עקסידענט האט פאסירט די נאכט אין די לאגווארדיע לופטפעלד אין ניו יארק, ווען א עיר קאנאדע פליגער וואס איז געקומען צו פארן פון מאנטריאל און האט געלאנדעט אין לאגווארדיע, האט זיך צוזאמגעקראכט מיט א פייער טראק אויפן ראנוועי, דער פילאט און קא פילאט זענען אומגעקומען אין די עקסידענט, און בחסדי ה' האבן אלע אידישע פאסאדזשירן אויפן פליגער איבערגעלעבט די עקסידענט, אריינגערעכנט איין שווער פארוואונדעטע.
די פליגער האט זיך געהויבן פון מאנטריאל נאך צען אזייגער ביינאכט, און האט באקומען ערלויבעניש צו לאנדן אויפן ראנוועי נומער 4 אין לאגווארדיע, אכט און דרייסיג מינוט נאך עלף ביינאכט האט די פליגער געלאנדעט אויפן ראנוועי, אבער אין די זעלבע צייט האט א פייער טראק באקומען ערלויבעניש פון די עיר טראפיק קאנטראלירער דורכצופארן די זעלבע ראנוועי, און ווען דער קאנטראלער האט אים פרובירט אפצושטעלן סעקונדעס דערויף איז שוין געווען צו שפעט אין די געשיכטע.
די פאדערשטע טייל פון די פליגער האט מיט אימפעט אריינגעקראכט אין די פייערטראק, און סעקונדעס דערויף איז די פליגער געקומען צו אן אפשטעל עטוואס ארויפציר אויפן ראנוועי. די לופטפעלד איז באלד געווארן פארשלאסן פאר לופט פארקער, און איז דערווייל נאך אפגעשפארט פאר אויספארשונגען און די נאכווייען.
אויפן פליגער האבן זיך געפונען ארום זיבעציג פאסאדזשירן, אריינגערעכנט א צאל היימישע אידן, פון די רייזנדע אויפן פליגער זענען צענדליגע לייכט פארוואונדעט געווארן, און עטליכע זענען געווארן אפגעפירט אים שפיטאל מיט שווערע וואונדן. דער פילאט און קא פילאט וואס זענען געווען אינעם קאקפיט וואס איז טאטאל צושמעטערט געווארן אין די קראך, זענען אומגעקומען אין די עקסידענט, און די פייערלעשער וואס האבן זיך געפונען אין די פייער טראק זענען אויך פארוואונדעט געווארן.
א העפטיגע אויספארשונג איז אקטיוו צו דערגיין וואס עס האט געפירט צו די טראגישע פליגער קראך, אין די צייט וואס די פאקט אז דער זעלבער מענטש האט קאנטראלירט סיי די אריינקומענדע פליגערס און סיי די עמערדזשענסי טרעקלעך אויף די ערד האט ווארשיינליך געשפילט א ראלע אין די עקסידענט, טראץ וואס עס איז א נארמאלע ערשיינונג אז דער זעלבער מענטש זאל עס טון שפעט ביינאכט ווען עס איז דא ווייניגער לופט טראפיק.
אידישע רייזנדע דאנקן און לויבן דעם אויבערשטן אויף די גרויסע חסדים, און מען איז מתפלל פאר א אידישע פרוי וואס איז שווער פארוואונדעט געווארן, אריאלה אביגיל בת דינה ציפורה בתוך שאר חולי ישראל.
