תושבי אנטווערפן וועלן דעם מאנטאג זיך פארזאמלען כאיש אחד בלב אחד, צו מעורר זיין רחמי שמים און מתפלל זיין לביטול רוע הגזירה, נאך די שווערע גזירה וואס האט באטראפן די אידישע געמיינדע אין בעלגיע מיט די פרישע קלאגעס קעגן קיום מצות ברית מילה בכל פרטיה ודקדוקיה.
ווי באקאנט האבן די בעלגישע אויטאריטעטן אריינגעגעבן אפיציעלע קלאגעס קעגן דריי חשובע מוהלים אין שטאט, אז זיי האבן אנגעבליך געמל'ט קינדער אן קיין אנוועזנהייט פון א דאקטער און אן די נויטיגע זיכערהייט מוסנאמען.
בהוראת הרבנים אין שטאט, ובראשם הגה"צ רבי אהרן שיף שליט"א גאב"ד אנטווערפן, וועלן אידן אין אנטווערפן זיך צוזאמנעמען דעם מאנטאג ביום המיוחס אויף אן עצרת תפילה, וואס וועט אפגעהאלטן ווערן אין די גרויסע אוסטען שוהל "בית הכנסת הגדול", נאך תפילת מנחה וועט הגה"צ גאב"ד אנטווערפן שליט"א אויפטרעטן מיט א דרשת התעוררות, און דערנאך וועט מען זאגן פרקי תהלים לביטול רוע הגזירה.
