בחצר הקודש בעלזא גרייט מען זיך היינט אויף א ערשטמאליגע מעמד אמירת סליחות, ווען טויזענטער אידן וועלן זיך פארזאמלען אינעם היכל בית המדרש הגדול אין קרית בעלזא ירושלים, זאגן סליחות אינאיינעם אויפן ספרדישן שטייגער, בנוסח עדות המזרח, אין שפיץ פון כ"ק אדמו"ר מבעלזא שליט"א.
ווי באקאנט פארמאגט דער בעלזא רבי שליט"א א נאנטע קשר צו די בני עדות המזרח, א נאנטע קירבה צו די גדולי ישראל חכמי הספרדים, און א פערזענליכע ווארעמקייט צו מחזיר בתשובה זיין די אלע סארט אידן וואס זענען דערווייטערט פון אידישקייט און פרומקייט, אין וואס דער רבי שליט"א איז עוסק כל ימי חייו אויף א שטארקן פארנעם.
דער רבי שליט"א האט שוין א שיינע פאר מאל מיטגעהאלטן אמירת סליחות דורך אחינו בני ישראל הספרדים, אין די טעג פון חודש אלול ווען די ספרדים זאגן סליחות שוין פון אנהייב חודש. אצינד וועט צום ערשטן מאל פארקומען אזא סארט מעמד אמירת סליחות בנוסח עדות המזרח אין ביהמ"ד הגדול אין קרית בעלזא ירושלים, וואו עס ווערן געלאדנט טויזענטער אידן פון אלע שיכטן און קרייזן, און אידישע נשמות וואס זוכן צו נתקרב ווערן לאבינו שבשמים.
די מעמד וועט זיין מיטן פערזענליכן השתתפות פון כ"ק אדמו"ר מבעלזא שליט"א, הגאון הגדול רבי יצחק יוסף שליט"א, און הגאון הגדול רבי יצחק דוד גראסמאן שליט"א רב פון מגדל העמק, עס וועט זיך אנהייבן עלף אזייגער ביינאכט מיט פאסיגע דרשות חיזוק וקירוב, נאכגעפאלגט מיט אמירת סליחות צוועלף אזייגער ביינאכט.
