מיט פרייד האבן חסידי טשערנאביל אין מאנטשעסטער אויפגענומען די בשורה טובה, אז הנה מלכך יבוא לך, כ"ק אדמו"ר מטשערנאביל שליט"א וועט קומען צו פארן אויף א געהויבענע באזוך אין שטאט מאנטשעסטער בקרב חסידיו, צו באשיינען די מעמד הנחת אבן הפינה פאר די נייע טשערנאבילער בית המדרש.
די טשערנאבילער קהילה אין מאנטשעסטער גייט שוין א שיינע פאר יאר, אונטער די פירערשאפט פון הרה"ג ר' פנחס ווייס שליט"א רב הקהילה, וועלכער איז אויך א טשערנאבילער אייניקל זייענדיג א איידעם ביי כ"ק אדמו"ר מהארנסטייפל מילוואקי שליט"א.
דער טשערנאבילער רבי שליט"א איז שוין עטליכע מאל געקומען צו פארן קיין מאנטשעסטער באזוכן בקרב חסידיו און משפיע זיין בהיכל בית מדרשו תורה וחסידות, אצינד ווען מ'גרייט זיך אויפצובויען א נייע גרויסע בית המדרש פאר די קהילה, וועט דער רבי אנקומען אויף א קורצע באזוך דעם קומענדיגן דינסטאג פרשת קרח כ"ו סיון, און באשיינען די מעמד הנחת אבן הפינה ברוב פאר והדר.
