ברגשי גיל וחדווה האבן תושבי מאנטשעסטער מקבל פנים געווען דעם חשובן גאסט כ"ק אדמו"ר מטשערנאביל שליט"א, וועלכער איז נעכטן דינסטאג אנגעקומען צוגאסט אין שטאט צו באשיינען די מעמד הנחת אבן הפינה פאר די נייע בנין בית המדרש דחסידי טשערנאביל אין שטאט.
די גרויסע מעמד איז פארגעקומען דינסטאג אויפדערנאכט אין זאל בית יעקב, בהדרת כבוד האט מען מקבל געווען את פני הקודש פונעם רבי'ן שליט"א ביים אריינקומען אין זאל, דברי פתיחה האט מען געהערט פון הרב יצחק אביגדור שטערן שליט"א ראש ישיבת כתר תורה, און דער ראש הדיינים דקהל מחזיקי הדת הרה"ג ר' חיים היימליך שליט"א האט מקבל געווען את פני הקודש מיט טרעפליכע ווערטער.
הגה"צ ר' פנחס ווייס שליט"א אב"ד טשערנאביל מאנטשעסטער האט אויפגעטרעטן מיט דברי ברכה לכבוד די מעמד, און דעם רבינ'ס זון הגה"צ ר' דוד טווערסקי שליט"א רב הקהילה אין בית שמש האט פארגעזאגט מזמורי תהלים כנהוג. צום הויכפונקט פונעם מעמד איז מען צוגעטרעטן צו די מעמד יציקת היסודות, ווען מען האט צוגעברענגט צום רבי'ן צו גיסן די אבן הפינה, דערנאך האט דער רבי שליט"א משמיע געווען ברכת הקודש לכל העם הנאספים.
דורכאויס די מעמד האבן זיך באטייליגט כמעט אלע אדמור"י ורבני העיר, האדמו"ר מהארדענקא, האדמו"ר מספינקא מאנטשעסטער, הגה"צ ר' ישראל חיים הורוויץ שליט"א אב"ד סאטמאר, הרה"ג ר' חיים היימליך שליט"א ראש הדיינים דקהל מחזיקי הדת, הרה"ג ר' אהרן גרינפעלד שליט"א דומ"ץ בעלזא, הרה"ג ר' מאיר חיים געשטעטנער שליט"א אבד"ק מחזיקי הדת, הרה"ג ר' ישראל פריעדמאן שליט"א אב"ד טשארטקוב, הרה"ג ר' דוב גרינבוים שליט"א דומ"ץ סקווירא, הרה"ג ר' נחמן כהנא שליט"א חדב"ן כ"ק אדמו"ר מפשעווארסק שליט"א, הרה"ג ר' מרדכי מעהלער שליט"א דומ"ץ סאטמאר, און נאך גדולי רבני העיר.
