מטעם קהילה קדושה אמונת ישראל איז געמאלדן געווארן אז די קומענדיגע מוצאי שבת קודש פרשת בשלח שבת שירה, וועט פארקומען א גרויסארטיגע מעמד התחלת כתיבת ספר תורה, פאר די ספר תורה וואס וועט געשריבן ווערן דורך אלע חברי הקהילה בצוותא חדא, לזכר נשמתו פונעם אומפארגעסליכן רועה נאמן הגה"צ רבי משה וואלפסאן זצ"ל אבד"ק אמונת ישראל, וועלכער איז נפטר געווארן מיט עטליכע חדשים צוריק.
די גרויסע מעמד וואס וועט פארקומען בהיכל ביהמ"ד הגדול אמונת ישראל אין בארא פארק, אין שפיץ פון נכדו ממלא מקומו הגה"צ אבד"ק אמונת ישראל שליט"א, וועט זיין קאמבאנירט מיט די מעמד "נייחא לנשמתא", מיטן ציהל אוועקצושטעלן א פינאנציעלע באזע פאר די קהילה קדושה אמונת ישראל אין שטאט ביתר אין ארץ ישראל, צו פארענדיגן די בוי ארבעט ביים בנין ביהמ"ד החדש וואס ווערט געבויעט לשם ולתפארת.
ווי באקאנט איז הגה"צ אבד"ק אמונת ישראל שליט"א נארוואס צוריקגעקומען פון זיין ערשטע באזוך אין ארץ ישראל נאכן איבערנעמען די כתר ההנהגה, דער רב האט געפראוועט א שבת בקרב הקהילה אין ביתר עילית, און דערביי געזעהן פונדערנאנט די הרחבת גבולי הקדושה וועט עס בויעט זיך בס"ד די נייע בית המדרש. אצינד צו געבן דעם לעצטן שטופ צו קענען ענדיגן די בוי ארבעט, ווערט געלאזט אין גאנג א מאסיווע פראיעקט נייחא לנשמתא, ווען מיט די זכותים וואס ווערן פארקויפט אינעם ספר תורה לזכרו פונעם משגיח זצ"ל, וועט מען האבן די זכיה צו שטיצן דעם מקום קדוש, און אויפבויען ישיבה על קברו לזכרו פונעם רעיא מהימנא.
ביים מעמד נייחא לנשמתא וועט אויפטרעטן מיט דברי זכרון איינער פון די חשובע אייניקלעך פונעם משגיח זצ"ל, הרה"ג ר' שמואל דוד הארדט שליט"א רב דקהל אמונת ישראל אין ביתר, און די צענטראלע דרשה וועט מען הערן פון הגה"צ אבד"ק אמונת ישראל שליט"א. די ספר תורה וועט בעז"ה ווערן אריינגעגעבן אין די קומענדיגע יאר לבית מדרשו של רבי, ביהמ"ד הגדול אמונת ישראל אין בארא פארק.
