נאך לאנגע יארן וואס חסידי טשערנאביל אין אמעריקע קוקן ארויס אויף א נייע גרויסע געביידע, אוועקצושטעלן א געהעריגע בית מקדש מעט לתורה ולתפילה, תחת דגלו והדרכתו פון כ"ק אדמו"ר מטשערנאביל שליט"א, איז אין א מזל'דיגע שעה אויפגענומען געווארן די פרייליכע בשורה, אז די פאקטישע בוי ארבעט אויפצובויען די נייע בנין ביהמ"ד האט זיך נארוואס אנגעהויבן און גייט אן אין פולן קראפט.
די טשערנאבילער בית המדרש אין בארא פארק איז איינקוואטירט אין א קליינע לאקאציע אויף די צוועלפטע עוועניו, א קליין היכל וואס איז שוין פון לאנג אויסגעוואקסן איר געברויך, און די נויט אויפצובויען א נייע גרויסע בנין פאר די קהילה שרייט זיך ארויס פון אלע זייטן. אין די לעצטע תקופה איז אפגעקויפט און צוגעגרייט געווארן א גרויסע שטח אויף די איין און פערציגסטע גאס נעבן די צוועלפטע עוועניו, נישט ווייט פון די יעצטיגע אלטע בית המדרש, און די עסקנים זענען אריבער די גענויע פלענער וואס פעלט זיך אויס פאר דעם פראיעקט.
אין די יעצטיגע טעג האט מען פאקטיש אנגעהויבן די בוי ארבעט אויפן פלאץ, אראפצוגראבן און גיסן די יסודות פאר די מקוה, און די ארבעט גייט אן מיט א שטארקע קראפט טאג טעגליך.
