דעם שבת קודש פרשת וישב איז ערווארטעט א געהויבענע גאסט אין שיכון סקווירא, ווען כ"ק אדמו"ר מבית יצחק ספינקא שליט"א וועט וויילן אויף שבת אין סקווירא שטעטל, צו מיטהאלטן א שבת בצל הקודש פון כ"ק אדמו"ר מסקווירא שליט"א.
דער ספינקא רבי שליט"א האלט אן א נאנטע קשר מיטן סקווירא רבי'ן, און האט שוין מערערע מאל מיטגעהאלטן פארשידענע מעמדים בחצר הקודש סקווירא, אין די לעצטערע יארן קומט דער רבי מיטהאלטן די חנוכה ליכט צינדן איינער פון די נעכט, און באשיינט שמחות און מאורעות אין די סקווירא הויף.
אצינד האט דער ספינקא רבי שליט"א אויסגעדרוקט רצון קדשו צו מיטהאלטן א פולער שבת בצל הקודש פון כ"ק אדמו"ר מסקווירא שליט"א, און בעז"ה דעם קומענדיגן שבת קודש פרשת וישב וועט דער רבי זיין צוגאסט אין סקווירא שטעטל צו מיטהאלטן דעם שבת בצל הקודש. די אכסניא וועט זיין אין שטוב פון דער באקאנטער מחנך הרה"ג ר' אלעזר יונה זילבערמאן שליט"א, וועלכער פארמאגט א נאנטע קשר מיטן ספינקא רבי'ן.
די לעצטע פאר וואכן האט דער רבי זיך אויפגעהאלטן אין אריזאנע אויף אפרוה, און פארלאפענע וואך איז דער רבי אריבער א לייכטע מעדיצינישע פראצעדור אין א לאקאלע שפיטאל, קומענדיגן דאנערשטאג וועט זיך דער רבי שליט"א בעז"ה אומקערן אהיים קיין ניו יארק, און וויילן אויף דעם שבת אין סקווירא שטעטל.
