יהדות לאנדאן הבירה גרייטן זיך אין די מאסן ארויסצוקומען מארגן דאנערשטאג ברחובה של עיר, צום גרויסארטיגן עצרת מחאה אדירה אויסצושרייען דעם וויי געשריי אין ליכט פון די שרעקליכע רדיפת הדת בארץ הקודש, מיט די גזירת הגיוס וואס הויערט אויף אחינו בני ישראל דרי ארץ הקודש.
די גרויסע עצרת מחאה וזעקה ווערט אראנדזשירט על פי קריאת הקודש פון די שרי התורה חברי הביד"ץ העדה החרדית שבירושלים עיה"ק, אין צוזאמענארבעט מיט די הנהלת התאחדות קהילות החרדים אין לאנדאן, וואס נעמט אריין אלע קהילות הקודש פון די חסידישע קרייזן אין לאנדאן ענגלאנד.
אין א געמיינזאמע קול קורא האבן אונטערגעשריבן די גדולי רבני העיר, די רבנים פון כדתיא, רבני קהילות סאטמאר, וויזניץ, באבוב, באבוב 45, פשעווארסק, מאחנובקא בעלזא, סלאנים, ביאלא, תולדות אהרן, און נאך פיל.
די עצרת מחאה וועט פארקומען מארגן דאנערשטאג ביום כ"א כסלו, פארנט פון די מדינת ישראל קאנסולאט אין לאנדאן סיטי, לענגאויס די פארנומענע קענזינגטאן גאס, וואו עס איז ערווארטעט בראש המשתתפים די גדולי רבני העיר. אויך זענען ערווארטעט די טויזענטער בחורי הישיבות פון מערערע חסידישע ישיבות אין שטאט, אברכי הכוללים און בעלי בתים, ארויסצוברענגען א מאכטפולע קול מחאה קעגן די רשעי הציונים וואס זוכן אונטערצוברענגען די כח התורה היל"ת.
