מיט הכנה דרבה און התרוממות הנפש, גרייטן זיך מונקאטשער חסידים צו דעם געהויבענעם שבת קודש פרשת במדבר, ב' סיון ביום המיוחס, ווען עס ווערט אפגעצייכנט די יומא דהילולא קדישא פון כ"ק הגה"ק ציס"ע בעל מנחת אלעזר ממונקאטש זי"ע.
אין דעם טאג ב' סיון, וואס געפאלט היי-יאר אויס ביום שבת קודש, וועלן אלע מונקאטשע חסידים זיך צוזאמנעמען און פראווענען אינאיינעם דעם גרויסן טאג בצל הקודש פון כ"ק אדמו"ר ממונקאטש שליט"א ממלא מקומו וממשיך דרכו פונעם בעל ההילולא זי"ע, באתרא קדישא אין מונקאטשער בית המדרש אין בארא פארק.
הונדערטער געסט פון איבעראל, חשוב'ע רבנים ומרביצי תורה, אנשים נכבדים ואישי ציבור, זענען ערווארטעט אויף דעם "שבת המיוחס" אין מונקאטשער הויף. חסידים פון אלע געגענטער קומען צו פארן מיטהאלטן דעם געהויבענעם שבת בצל הקודש. אין בעפארברייטונג צום שבת הילולא, און דער וועד האש"ל טוט יעדן אנטפאנגען בכבוד הראוי, און טוען יעדן באזארגן מיט אכסניות און אש"ל מלא על צד היותר טוב לפי כבודו הראוי.
מטעם די מונקאטשער קהלה ווערט צוגעשטעלט די סעודות שבת קודש פאר די פילע אורחים אינעם בנין בית המדרש, די סעודה ליל שבת קודש וועט אפגעראכטן ווערן בראשות די קינדער פונעם רבי'ן, הרבנים הגאוה"צ שליט"א. ביים סעודת עתיקא קדישא, ביום שבת קודש, וועט דער גאנצער ציבור האבן די זכיה צו זיין מאוכלי שלחן המלך, און אפרעכטן די סעודת שבת על שלחנו פונעם רבי'ן שליט"א.
באזונדער איז אויפגענומען געווארן די מעלדונג, אז ביי די סעודת שבת קודש וועלן די מסובין האבן די זעלטענע זכיה זיך וואונטשן לחיים ולברכה, אויף א "כוס ישועות", א חפץ של צדיק, דער הייליגער בעל ההילולא זי"ע.
במשך די סעודות שבת קודש וועלן אויפטרעטן מיט דברי תורה לכבוד היום, חשוב'ע רבנים און מרביצי תורה שליט"א. במיוחד וועט געהערט ווערן דברים יקרים ונעימים, פונעם בארימטן פה מפיק מרגליות, הגה"צ ר' מאיר צוויבל שליט"א, מח"ס נר המאיר, אן אייניקל פון הרה"ח המפו' ר' יוסף צוויבל ז"ל, פון די מייסדים פונעם מונקאטשער בית המדרש אין בני ברק, און מחשובי תלמידי בעל ההילולא זי"ע.
שטייענדיג אינעם זיבן און אכציגסטן יומא דהילולא, וועט מיט א פרישקייט און ווארימקייט זיך ווידער צוזאמקומען פון נאנט און ווייט, טאטע'ס מיט קינדער, זיידעס מיט אייניקליך, מיטצולעבן א מונקאטשער שבת קודש, א יומא דנשמתא מיט די נשמה פונעם בעל ההילולא קדישא, גענוי אויף דעם שניט ווי אזוי ער האט געפראוועט זיין עבודת הקודש בחיים חיותו בהאי עלמא.
די צענטראלע "סיום הש"ס", וואס איז געלערנט געווארן איבערן יאר, אין עטליכע מחזורים, לכבוד ההילולא קדישא, וועט אי"ה אפגעראכטן ווערן ביים עריכת שלחנו הטהור פונעם רבי'ן שליט"א לכבוד ההילולא, ביום שבת קודש אין די נאכמיטאג שעה'ן, בהיכל בית המדרש הגדול.
ובאו כולם בברית יחד.
