יעצט נאכמיטאג איז כ"ק אדמו"ר ממונקאטש שליט"א ארויסגעפארן ממעון קדשו אין בארא פארק, אויף א קורצע נסיעה קיין לאנדאן ענגלאנד, צו באשיינען די שמחת החתונה פון א קינד ביי הגה"צ רבי שמשון גליק זצ"ל דומ"ץ מונקאטש לאנדאן.
דער מונקאטשער דיין זצ"ל פון לאנדאן איז נפטר געווארן מיט פופצן יאר צוריק אין א יונגן עלטער, איבערלאזנדיג א שטוב מיט יתומים אינדערהיים, כ"ק אדמו"ר ממונקאטש שליט"א האט דאן פארשפראכן צו חתונה מאכן די קינדער און זיך פערזענליך באטייליגן, א הבטחה וואס דער רבי שליט"א האט מקיים געווען דורכאויס די יארן, ארויספארנדיג אין די מרחקים צו באשיינען די שמחות פונדערנאנט.
אצינד ווען דער חתן די יונגסטע קינד פונעם דיין זצ"ל גרייט זיך אין א מזל'דיגע שעה צו גיין אונטער די חופה, האט כ"ק אדמו"ר ממונקאטש שליט"א זיך ווידער ארויסגעלאזט אין וועג צו באשיינען די שמחת החתונה, וואס קומט פאר מארגן מיטוואך אין די יסודי התורה זאל אין לאנדאן, די חתן איז א אייניקל פון הגה"צ רבי חיים יוסף דוד ווייס שליט"א דומ"ץ סאטמאר אנטווערפן, און די כלה איז א טאכטער פון הגה"צ ר' יוסף יהושע לייפער שליט"א, זון פון כ"ק אדמו"ר מנדבורנא לאנדאן שליט"א, און איידעם ביי הגה"צ רבי יעקב שמשון יאקאבאוויטש שליט"א מגארליץ.
יעצט נאכמיטאג נאך תפילת מנחה בביתו נאוה קודש אין בארא פארק, האט זיך דער רבי שליט"א ארויסגעלאזט על עם הדרך, די פליגער וועט זיך הייבן נאך זעקס אזייגער, און מארגן פארטאגס ביים אנקומען קיין לאנדאן, וועט דער רבי שליט"א דאווענען שחרית אין א ספעציעל אפגעדונגענע זאל אין די היטרו לופטפעלד אינאיינעם מיט א קבוצה נכבדי העדה און מקורבים.
מארגן אויפדערנאכט וועט דער רבי שליט"א באשיינען די חתונה, דינען אלס מסדר קידושין און טאנצן מצוה טאנץ. צומארגנס דאנערשטאג יום ב' דראש חודש חשון וועט דער רבי שליט"א דאווענען שחרית בבית מדרשו קהל מנחת אלעזר מונקאטש אויף קעיזינאוו ראוד אין די סטעמפארד הילל געגנט אין לאנדאן, נאכגעפאלגט מיט א מסיבת לחיים לכבוד ראש חודש.
לויטן פלאן וועט דער רבי שליט"א באשיינען א רייכע מסיבה לטובת די הרחבת גבולי הקדושה אינערהאלב ביהמ"ד מונקאטש אין לאנדאן, און דאנערשטאג נאכמיטאג וועט זיך דער רבי ארויסלאזן אויפן וועג אהיים צוריק קיין בארא פארק.
