מיט גרויס צער און טרויער ווערט אויפגענומען די ביטערע בשורה פון ארץ ישראל, איבער די פטירה פון הגאון הגדול המפורסם רבי מרדכי אויערבאך זצ"ל, רב ביהמ"ד אביר יעקב אין תל אביב, וועלכער האט צוריקגעגעבן זיין ריינע נשמה ליוצרה אין עלטער פון פיר און אכציג יאר, נאך שווערע געזונטהייט קאמפליקאציעס מיט וואס דער רב האט זיך געמוטשעט די לעצטע תקופה.
דער רב זצ"ל איז געווען א גאון מפורסם מזה בן מזה, א זון פונעם פוסק הדור הגאון הגדול רבי שלמה זלמן אויערבאך זצ"ל, וועלכער האט געשאקלט זיין וועלט מיט זיין כח התורה, און זיינע פסקים איז געווען אנגענומען בכל תפוצות ישראל.
געבוירן איז ער אין ירושלים י"ד שבט תש"ב, וואו ער איז אויפגעוואקסן אין די שערי חסד געגנט אויפן שויס פון זיין גרויסן פאטער, פון קינדווייז אן האט זיך אנגעזעהן זיין התמדת התורה און יגיעה, אלס בחור האט ער געלערנט אין די בארימטע פאנאוויטשע ישיבה וואו ער איז געשטיגן אין לערנען בתורה ועבודה.
בהגיעו לפירקו האט ער חתונה געהאט מיט זיין חשובע רעבעצין תבחלחט"א, א טאכטער פון הרה"ג ר' אהרן לעמבערגער זצ"ל, וועלכער איז געווען אן איידעם ביים קאפיטשניצער רבי'ן הרה"ק רבי אברהם יהושע העשיל זצ"ל. זיין רעבעצין איז אויפגעוואקסן אין שטוב פון כ"ק אדמו"ר הרה"ק בעל אביר יעקב מסאדיגורא זצ"ל, און נאך די חתונה איז דער רב שליט"א געווארן אויפגענומען אלס ממלא מקום אלס רב אין די סאדיגורא בית המדרש אין תל אביב, שטייענדיג שוין נאכן הסתלקות פונעם סאדיגורא רבי'ן זצ"ל דער אביר יעקב וואס האט נישט איבערגעלאזט קיין קינדער ל"ע.
דער רב זצ"ל האט משמש געווען ברבנות העכער א יובל יארן כולן שוין לטובה, און אויפגעפלאמט אידישע הערצער אינעם גרויסן שטאט תל אביב, צווישן די פארנומענע אלגעמיינע ציבור האט דער רב משפיע געווען אויף א חסידישע פארנעם פאר פילע אידן וואס האבן משכים געווען לפתחו, און מקרב געווען פילצאליגע אידן בעלי תשובה תחת כנפי השכינה.
דאס ווארעמע הארץ פונעם רב איז געווען א שם דבר ביי טויזענטער אידן, גאר אסאך זענען געקומען נהנה זיין מאורו עצה ותושיה, און מקבל געווען א דרך אין תשובה און עבודת השם. מיט א זעלטענע געטריישאפט און איבערגעגבנקייט האט דער רב מחנך געווען און מדריך געווען טויזענטער תלמידים דורכאויס די יארן, און איז געבליבן מקושר צו זיי אלע יארן.
דער רב האט אויפגעשטעלט מוסדות התורה, כוללים און סעמינארן, געהאלטן דרשות צו מעורר זיין אידישע קינדער און אריינגעשלעפט אידן פון די אלגעמיינע גאס אריין אין די ישיבה וועלט, אין א וועלט פון שמירת תורה ומצוות. דאס זעלבע איז געווען מיט גמילת חסדים וואו דער רב זצ"ל איז געווען א ריז, און ארויסגעהאלפן אומצאליגע אידן שלא על מנת לקבל פרס.
ליידער איז דער רב נישט געווען געזונט די לעצטע תקופה, און דורכאויס יו"ט ראש השנה איז דער רב געווען שפיטאליזירט אין די איכילוב שפיטאל אין תל אביב. היינט שבת קודש ח' תשרי נאכמיטאג האט דער רב זצ"ל צוריקגעגעבן זיין ריינע נשמה ליוצרה אין עלטער פון פיר און אכציג יאר, צום טיפן צער פון אלפי תלמידיו חסידיו ומעריציו וכל בית ישראל.
די מסע הלוויה איז פארגעקומען היינט מוצאי שבת קודש בהיכל בית מדרשו אויף די עליפאנט גאס אין תל אביב, דערנאך איז די מיטה געפירט געווארן קיין ירושלים עיה"ק וואו די לוויה איז ארויס ביים בית הלוויות שמגר, אויפן וועג צום הר המנוחות וואו ער איז געקומען לקבורה.
דער רב לאזט איבער א הערליכע דור ישרים יבורך, חשובע קינדער און אייניקלעך זרע ברך ה', די זיהן הגה"צ ר' אהרן אויערבאך שליט"א איידעם ביי הגה"צ ראב"ד אנטווערפן זצ"ל, הגה"צ ר' חיים לייב אויערבאך שליט"א איידעם ביי כ"ק אדמו"ר מסלונים שליט"א, די איידימער הגה"צ ר' אברהם נתן בורנשטיין שליט"א מראדאמסק, און הגה"צ ר' יוסף מאיר פעלדמאן שליט"א, זון פון הגה"צ אבד"ק תורה עץ חיים אין לאנדאן שליט"א.
אין לויף פון די יארן האט דער רב זצ"ל באשיינט גרויסע רעבישע חתונות, זייענדיג א מחותן מיט פילע גדולי אדמורי"ם ורבנים, צווישן זיי האדמורי"ם מבאיאן, קארלין סטאלין, בוהוש, קרעטשניף י"ם, אלכסנדר, דזיקוב וויזניץ, לוצק, פיטסבורג, סוכוטשוב, טריסק, זוועהיל, אשלג, ביאלא, און נאך.
