היינט קומט פאר די גרויסארטיגע מעמד הכנסת ספר תורה בחצר הקודש סקווירא, פאר די ספר תורה וואס איז געשריבן געווארן דורך כלל עדת חסידי סקווירא אין ראם פון מבצע קדשינו, זיך צו מחזק זיין קעגן די טעכנעלאגישע נסיונות, די מעמד וועט זיין איינגעטיילט אין עטליכע חגיגות, תפילת שחרית און מסיבת לחיים פאר די בחורי חמד אין די זאל פון עטרת טשארנא, די תהלוכה ברוב פאר והדר אויף די גאסן פון שטעטל, די ריקודין בהיכל ביהמ"ד הגדול והחדש, און די סעודת מצוה שפעטער אויפדערנאכט בהיכל ביהמ"ד הגדול והחדש, אינאיינעם מיט די סיום פון כל התורה כולה וואס איז געלערנט געווארן דורך כלל עדת חסידי סקווירא פון איבער די וועלט.
היינט קומט פאר די גרויסע מעמד אסיפה רבתי בחצר הקודש באבוב 45, זיך צו מחזק זיין בעניני צניעות בקדושה וטהרה, די מעמד קומט פאר אין די פראכטפולע זאל פון די פאלאס געאייגענט פאר אנשים ונשים, אין שפיץ פון כ"ק אדמו"ר מבאבוב 45 שליט"א וועלכער קערט זיך היינט צוריק נאך א צוויי וואכעדיגע רייזע אין אריזאנע אויף אפרוה.
כ"ק אדמו"ר מפאפא שליט"א לאזט זיך היינט ארויס אויף א געהויבענע מסע הקודש "עזרת אבותינו" צו פוקד זיין די מקומות הקדושים אין אייראפע, לרגל די יומא דהילולא קדישא פון זקינו הרה"ק בעל ויגד יעקב מפאפא זי"ע, אין באגלייטונג פון פילע חסידים פון איבער די וועלט. מארגן אינדערפרי וועט דער רבי אנקומען קיין וויען עסטרייך, און צופארן קיין פרעשבורג צו פוקד זיין דעם ציון הק' פונעם הייליגן חתם סופר זי"ע.
כ"ק אדמו"ר מוויזניץ שליט"א פון קייאמישע וועלכער האט געוויילט די לעצטע וואך צייט אין לאס אנדזשעלעס לטובת מוסדותיו הקדושים, קערט זיך היינט צוריק למעון קדשו אין קרית וויזניץ קייאמישע לעיק.
היינט כ"ח שבט געפאלט די יומא דהילולא קדישא פון הרה"ק רבי מנחם נחום מראחמיסטריווקא זי"ע, נכדו כ"ק אדמו"ר מראחמיסטריווקא שליט"א וועט אפרעכטן די יארצייט טיש היינט פארנאכטס אין ביהמ"ד הגדול ראחמיסטריווקא אין ירושלים.
היינט קומט פאר די יערליכע דינער לטובת מוסדות סאטמאר אין קרית יטב לב אין בלומינגבורג, עס קומט פאר אין זאל עטרת פעסיל לאה בבנין המוסדות.
היינט קומט פאר די מעמד כבוד התורה בחצר הקודש בוהוש, חלוקת פרסים פאר די תלמידי הישיבה וואס האבן געלערנט שעות רצופות בימי השובבי"ם, די מעמד קומט פאר אין זאל פון ביהמ"ד בוהוש אויף רחוב חגי אין בני ברק, אין שפיץ פון כ"ק אדמו"ר מבוהוש שליט"א.
היינט קומט פאר אן עצרת הספד והתעוררות אין ביהמ"ד קהל בית משה אהרן פשעווארסק אין וויליאמסבורג, לזכרו פונעם רב הקהילה הגה"צ רבי משה אהרן רייך זצ"ל גאב"ד פשעווארסק וויליאמסבורג, ככלות השלושים לפטירתו.
היינט נאכט כ"ט שבט געפאלט די צווייטע יארצייט פון כ"ק אדמו"ר מחוסט זצ"ל, די צענטראלע יארצייט סעודה און סיום הש"ס קומט פאר אין זאל פון אנשי ספרד אין בארא פארק, פילע אידן וועלן ארויפגיין צום ציון הק' אויפן בית החיים הר שלום אין עירמאונט, וואו עס איז אויפגעבויעט געווארן א נייע אהל אויפן ציון הק'.
אריינצושיקן מודעות און נייעס, שיקט אן אימעיל צו NEWS@JDNMAIL.COM
