אפדעיט 10:00
יעצט נאך וואס כ"ק אדמו"ר מסקווירא שליט"א האט זיך געזעצט שבעה בביתו נאוה קודש, איז דער שוואגער כ"ק אדמו"ר מסאטמאר שליט"א אריינגעקומען אין רבינ'ס שטוב אויף ניחום אבלים, וואו די צוויי שוואגערס שמועסן אינאיינעם זכרונות מבית חותנם הרה"ק בעל ישועות משה מוויזניץ זי"ע.
ווי עס ווערט איבערגעגעבן מטעם העסקנים האפט מען אויף א מעגליכקייט אז דורכאויס די ימי השבעה וועט כ"ק אדמו"ר מסקווירא שליט"א זיצן שבעה אין ביהמ"ד הגדול, כדי צו פארמיידן א שטופעניש און געדרענג.
-------------------------------
אפדעיט 9:44
טויזענטער חסידים שטייען אצינד פארזאמלט אין צוויי שורות לענגאויס די רחבת בית החיים, כ"ק אדמו"ר מסקווירא שליט"א געפונט זיך צוזאמען מיט די קינדער די אבלים אין א גרויסע ספרינטער ווען, און עס פארט שטייטליך אדורך די גאנצע שורה, ווען אלע חסידים זענען מנחם דעם רבי'ן בברכת תנחומין, פון דארט וועט דער רבי אהיימפארן לביתו נאוה קודש און דאווענען מעריב, און דערנאך וועלן די חסידים האבן די געלעגנהייט אריבערצוגיין מנחם אבל זיין.
-------------------------
אפדעיט 9:30
מען האט נארוואס געענדיגט סתימת הגולל, הרב מענדיל בערגער יושב ראש החברא קדישא זאגט פאר צדוק הדין אויפן מייקראפאן, און די קינדער גייען יעצט זאגן קדיש.
____________________
אפדעיט 9:25
דורכאויס די לוויה זעהן זיך שוין אן א צאל אדמורי"ם ורבנים קרובי המשפחה, כ"ק אדמו"ר מסאטמאר שליט"א, כ"ק האדמורי"ם מוויזניץ פון מאנסי, קייאמישע, וויליאמסבורג, בארא פארק, כ"ק האדמורי"ם מראחמיסטריווקא, ראחמיסטריווקא לעיקוואד, ראחמיסטריווקא מאנסי, ראחמיסטריווקא וויליאמסבורג, און ראחמיסטריווקא ספרינג וואלי, כ"ק אדמו"ר מסקווירא מב"פ, כ"ק אדמו"ר מבארניב, כ"ק אדמו"ר מזוועהיל ארה"ב, הגה"צ אב"ד מישקאלץ, הגה"צ אב"ד בית אהרן, און נאך חשובע אדמורי"ם ורבנים.
אויפן שטח בית החיים איז צוגעגרייט א ספעציעלע ספרינטער, וואו כ"ק אדמו"ר מסקווירא וועט אריינגיין נאכן קבורה מקבל זיין אבילות, די גאנצע ציבור חסידים וועט זיך שטעלן אין צוויי שורות און אריבערלויפן אויף ביידע זייטן פון די ספרינטער, און מנחם אבל זיין דעם רבי'ן און די קינדער.
____________________
אפדעיט 9:14
מען האט יעצט געענדיגט מאכן די הקפות כנהוג, כ"ק אדמו"ר מסקווירא שליט"א און די קינדער גייען אריין אינעווייניג אינעם אוהל, און מ'הייבט אן מיט די קבורה.
____________________
אפדעיט 9:07
מען הייבט אן אצינד צו מאכן די הקפות, די רבנים אדמורי"ם און דייני הקהילה רינגלען ארום די מיטה, דער יושב ראש החברא קדישא הרב החסיד ר' מענדיל בערגער הי"ו זאגט פאר די נוסח כנהוג.
____________________
אפדעיט 9:04
אין די פריערדיגע מינוטן איז די מיטה אנגעקומען אויפן בית החיים אין שיכון סקווירא, כ"ק אדמו"ר מסקווירא איז אריינגעפארן מיט די קאר ביז צום באשטימטן ארט, דער רבי האט זיך געשטעלט ביים שטענדער און די קינדער האבן געריסן קריעה כדת וכדין.
אין די יעצטיגע מינוטן זאגט דער רבי בקול בוכים די ברכה פון דיין האמת בשם ומלכות, און רייסט קריעה נגד לבו.
____________________
אפדעיט 8:45
דרכי שיכון סקווירא אבילות, די גאסן אין סקווירא זענען שווארץ מיט טויזענטער מלווים, וואס מאכן דעם וועג דורך די גאסן פון דזשעפערסאן, וואשינגטאן, לינקאלן, רוזעוועלט, ביז צום בית החיים.
כ"ק אדמו"ר מסקווירא שליט"א פארט מיט די קאר אונטער די מיטה, אין די פריערדיגע מינוטן האט מען זיך אפגעשטעלט פארנט פון די בנין בית חינוך לבנות אין שיכון סקווירא, וואו הרה"ח ר' דוד בערגער הי"ו משמש בקודש ביי כ"ק אדמו"ר מסקווירא שליט"א האט געמאכט א קל מלא רחמים.
____________________
אפדעיט 8:30
יעצט ביי די מסע הלוויה איז כ"ק אדמו"ר מסקווירא שליט"א ארויסגעקומען נעבן די מיטה אין באגלייטונג פון די קינדער הגאוה"צ שליט"א, הרה"ג ר' יוסף ישראל אייזענבערגער שליט"א דומ"ץ הקהילה האט געמאכט די קל מלא רחמים כנהוג, און דער ציבור האלפים הייבט אן אצינד באגלייטן אין ריכטונג פון די דזשעפערסאן גאס.
ביי די לוויה געפונען זיך צווישן אנדערע דער שוואגער כ"ק אדמו"ר מסאטמאר שליט"א, די קרובי המשפחה כ"ק האחים האדמורי"ם מוויזניץ שליט"א, כ"ק האחים האדמורי"ם מראחמיסטריווקא שליט"א, און נאך פילע רבנים וחשובי העדה.
____________________
אפדעיט 8:15
די מסע הלוויה פון הרבנית הצדיקת מסקווירא ע"ה הייבט זיך אן אין די יעצטיגע מינוטן פארנט פון ביהמ"ד הגדול אין שיכון סקווירא, די מיטה קומט יעצט אן צום באשטימטן ארט צווישן די באריקאדן, וואו טויזענטער חסידים זקנים עם נערים זענען פארזאמלט איינגעהילט אין גרויס טרויער.
אין די פריערדיגע מינוטן איז די מיטה אדורכגעפירט געווארן אויף די גאסן פון שטעטל וואו עס זענען פארזאמלט די נשים צדקניות, נאך וואס די בני המשפחה האבן זיך געזעגנט בביתו נאוה קודש פון כ"ק אדמו"ר מסקווירא שליט"א.
____________________
