אין די יעצטיגע טעג איז געמאלדן געווארן אז כ"ק אדמו"ר מסאדיגורא שליט"א וועט אונטערנעמען א בליץ נסיעה קיין אמעריקע, צו באשיינען די שמחת החתונה במעונו פון הנגיד המרומם ר' מרדכי שלום ישראל שפירא שליט"א, זון פון הרה"ג ר' פנחס שפירא שליט"א רב חסידי סאדיגורא תל אביב, און אייניקל פון הרה"ק בעל עקבי אבירים מסאדיגורא זי"ע.
דער רבי שליט"א איז ערווארטעט צו לאנדן אין די קענעדי לופטפעלד דעם קומענדיגן מאנטאג ערב ראש חודש ניסן דריי אזייגער נאכמיטאג, מאנטאג אויפדערנאכט וועט דער רבי באשיינען בראש ביי די שמחת החתונה אין שטאט לעיקוואד. צומארגנס דינסטאג ראש חודש ניסן, וועט דער רבי דאווענען שחרית בבית מדרשו אין לעיקוואד, און דערנאך אפרעכטן א לחיים טיש לכבוד ראש חודש.
נאכן ראש חודש טיש און קבלת פנים וועלן חסידי סאדיגורא האבן די געלעגנהייט אריינצוגיין אל הקודש פנימה און מקבל זיין ברכת הקודש לקראת יום טוב פסח הממשמש ובא, און שפעטער נאכמיטאג וועט דער רבי זיך ארויסלאזן אויפן וועג צוריק קיין ארץ הקודש.
