היסטאריע שפילט זיך אפ אין די יעצטיגע טעג בחצר הקודש סאדיגורא, ווען מ'גרייט זיך אריינצוטרעטן אין א מאסיווע פראיעקט אויפצובויען א גיגאנטישע בנין מרכז העולמי, וואס וועט דינען אלס צענטערפונקט פאר חסידי סאדיגורא, און א געשמאקע אכסניא פאר די תפילות און טישן בצל הקודש פון כ"ק אדמו"ר מסאדיגורא שליט"א.
שוין לאנגע יארן וואס אינעם עקזיסטירנדן בית המדרש דחסידי סאדיגורא אויף רחוב גוטמאכר, הערשט א שרעקליכע געדרענג צוליב די ריזן ציבור בליעה"ר, איבערהויפט אין די שיינע שבתים און ימים טובים, און ביי ספעציעלע מאורעות בחצר הקודש, ווען מ'קען זיך ממש נישט רירן אין בית המדרש.
אויסער דעם האט מען לעצטנס אויפגעבויעט א צייטווייליגע היכל הטישן וואו דער רבי פראוועט די טישן אויף א געהויבענע פארנעם, אבער עס איז ווייט פון א באקוועמע אכסניא, און מען ברויך דריגענד אהערשטעלן א נייעם בנין מיט פראכט, צו פארגרינגערן פאר די הונדערטער חסידים מדי יום ביומו.
אין די לעצטערע חדשים איז אונטערגעקומען א גלענצנדן מקח אויפן טיש פון די הנהלת המוסדות, ווען די בנין וואס שטייט נעבן די בית המדרש, איז ארויסגעשטעלט צום פארקויפן. פארשטייט זיך אז מען האט נישט געזשאלעוועט קיין צייט און געלט, און באלד אריינגעשפרינגען אינעם פראיעקט אפצוקויפן דעם גאנצן שטח און די בנין, און שוין בקרוב ממש וועט די תלמוד תורה זיך אריינציען אינעם נייעם בנין, אין די צייט וואס עס ווערן געמאכט העפטיגע פלענער צו לאזן אויפבויען א גיגאנטישע בנין מרכז העולמי אויפן פלאץ פון ביידע בנינים.
די מקח איז געשלאסן געווארן אין א מזל'דיגע שעה, בעידודו פון כ"ק אדמו"ר מסאדיגורא שליט"א, און אצינד טוען די עסקנים אויפטרייבן די נויטיגע געלטער צו קענען פאראויסגיין מיטן מאסיוון פראיעקט.
בורא עולם בקנין השלם זה הבנין!
