מיט א קארגע וואך פארבליבן זענען טויזענטער סאטמארע חסידים, בעלי בתים ביזנעסלייט און אינגעלייט, איינגעהילט אין עקסטאז צום גרויסארטיגן ביזנעס עקספאו וואס קומט פאר צום פערטן מאל אין א רייע, ווען טויזענטער חסידים זענען מקיים דעם "וחי אחיך עמך", און נעמען זיך צונויף בשבת אחים גם יחד צו האנדלען און וואנדלען איינער מיטן אנדערן מיט גרויס הצלחה ב"ה.
די גרויסארטיגע "זה מזה" ביזנעס עקספאו איז היינט צוטאגס די גרעסטע אידישע ביזנעס עקספאו אלוועלטליך, וואס ציהט א באטייליגונג פון טויזענטער אידישע ביזנעסלייט, און קומט פאר אין די גיגאנטישע ניו דזשערזי עקספאזישען צענטער. אלע בודקעס זענען שוין אויספארקויפט, און פילע אינגעלייט און בעלי בתים האנדלען זיך איין טיקעטס אריינצוגיין, ווען יעצט קאסט עס בלויז פינף און צוואנציג דאללער, פופצן דאללער ווייניגער ווי די פרייז ביים טיר אריינצוגיין.
ביים היי יעריגע עקספאו ווערט אהערגעשטעלט גרויסע חידושים, סיי מיט די סארט לעקציעס וואס וועט געגעבן ווערן, ווען עס וועלן אויפטרעטן וועלט בארימטע פילאנטראפן און היסטארישע תומכי תורה, צווישן זיי דער בארימטער תומך תורה ר' ראובן וואלף הי"ו, און דער בארימטער תומך תורה ר' ראלף הערצקא הי"ו.
אויסער דעם ווערט צוגעשטעלט א זעלטענע סערוויס דורך די חשובע עסקנים, א ספעציעלע אפטיילונג וואו עס וועלן זיך געפונען עטליכע ביזנעס קאנסאלטינגס, און פאר בחינם אין כסף וועט מען קענען האבן א פריוואטע שמועס פאר פופצן מינוט איבער סיי וועלכע נושא.
