מיט א זעלטענע פלאם פייער האט כ"ק אדמו"ר מתולדות אברהם יצחק שליט"א עולה געווען לתורה אויף די היסטארישע ירושה ספר תורה פונעם הייליגן בעל שם טוב זי"ע, וואס געפונט זיך באוצרו הטוב פון כ"ק אדמו"ר ממאחנובקא בעלזא שליט"א, און ווערט ארויסגענומען צום באנוץ בלויז אין זעלטענע פעלער.
שוין א לאנגע תקופה וואס כ"ק אדמו"ר מתולדות אברהם יצחק שליט"א האט אויסגעדרוקט רצון קדשו צו עולה זיין לתורה אויף דעם היסטארישן ספר תורה, און אצינד ווען דער רבי שליט"א איז געווען צוגאסט אין בני ברק לכבוד די חתונה פון א אייניקל, איז דעם רבינ'ס לעבנס וואונטש ענדליך פארווירקליכט געווארן.
נאך די חתונה וואס איז פארגעקומען מיטוואך נאכט אין ביהמ"ד הגדול מאחנובקא בעלזא אין בני ברק, האט דער רבי שליט"א איבערגענעכטיגט אין שטוב פון הרה"ג ר' יעקב יהושע ענגלענדער שליט"א ראש ישיבת מאחנובקא בעלזא. דאנערשטאג אינדערפרי איז דער רבי ערשינען אויף תפילת שחרית אין ביהמ"ד הגדול מאחנובקא בעלזא, אינאיינעם מיט כ"ק אדמו"ר ממאחנובקא בעלזא שליט"א און נאך הונדערטער חסידים ותושבי העיר וואס האבן געוואלט מיטלעבן דעם היסטארישן מחזה.
צו דעם געלעגנהייט זענען אויך געלאדנט געווארן די תלמידי הישיבה גדולה תולדות אברהם יצחק וועלכע האבן זיך אויסגעצייכנט אין די לימודים, און האבן זוכה געווען אין דעם זעלטענעם געשאנק צו קענען מיטלעבן די הייליגע מאמענטן. דאס דאווענען איז פארגעקומען מיט א פלאקער אויפן וויזניצער נוסח, און ביי קריאת התורה האט מען בחרדת קודש ארויסגענומען די הייליגע ספר תורה.
כ"ק אדמו"ר מתולדות אברהם יצחק שליט"א האט עולה געווען כהן, און נכדו החתן האט עולה געווען שלישי. טראץ וואס דער רבי איז היבש אפגעשוואכט האט דער רבי שליט"א געמאכט הגבה אויף דעם שווערן ספר תורה, נישט וועלנדיג פארפאסן אזא היסטארישע זכות, און מיט גלילה איז מכובד געווארן דעם רבינ'ס איידעם כ"ק אדמו"ר מספינקא מאנסי שליט"א.
דער תולדות אברהם יצחק רבי שליט"א איז געבליבן זיצן מיטן ספר תורה פאר עטליכע מינוט, זייענדיג איינגעהילט אין א זעלטענע התלהבות אחוז בשרעפי קודש, דערנאך האט מען צוריקגעשטעלט דעם ספר תורה אין ארון הקודש און פארענדיגט דאס דאווענען.
נאכן דאווענען איז פארגעקומען א גרויסע לחיים טיש אין שפיץ פון כ"ק האדמורי"ם מתולדות אברהם יצחק און מאחנובקא בעלזא, און דער מאחנובקא בעלזא רבי האט ארויסגעברענגט מבית גנזיו נאך עטליכע ירושה חפצים, א מעסער פון הרה"ק מבעלזא זי"ע מיט וואס דער תולדות אברהם יצחק רבי איז מכובד געווארן צו שניידן די פירות, און א לעפל פון הרה"ק מבעלזא זי"ע מיט וואס דער רבי האט געטרונקען וויין און געוואונטשן לחיים.
דערנאך איז כ"ק אדמו"ר מתולדות אברהם יצחק אריין אויף א באזוך אין שטוב פון כ"ק אדמו"ר ממאחנובקא בעלזא, און פאר א לענגערע צייט ארומגעשמועסט שיינע ענינים און סיפורי צדיקים, דער מאחנובקא בעלזא רבי האט ארויסגענומען נאך עטליכע היסטארישע ירושה חפצים און דאס געוויזן פארן גרויסן גאסט, א טאביק פושקע פון הרה"ק רבי איציקל מסקווירא זי"ע, און נאך פארשידענע חפצים.
צווישן די חפצי קודש האט מען ארויסגעברענגט די הייליגע תפילין פונעם בעשטה"ק, דער מאחנובקא בעלזא רב האט ארויסגענומען די פרשיות און פארבעטן דעם תולדות אברהם יצחק רבי צו זאגן קריאת שמע דערין. דער רבי האט גענומען די פרשיות אין האנט און מיט א זעלטענע התעוררות געליינט קריאת שמע בקול רם. דערנאך האט מען געברענגט היסטארישע ברילן וואס הרה"ק מבעלזא זי"ע האט געטראגן, דער תוא"י רבי האט עס אנגעטון און געזאגט אז ער האפט עס וועט אים ברענגען א רפואה אויף די אויגן.
מיט רירנדע הרגשים האט כ"ק אדמו"ר מתולדות אברהם יצחק זיך געזעגנט מיט ברכות לרוב, און דער מאחנובקא בעלזא רבי האט ארויסבאגלייט דעם רבי'ן ביז צו די קאר.
