אין די יעצטיגע טעג איז באשטעטיגט געווארן די פלענער איבער די בעפארשטייענדע נסיעה וואס כ"ק אדמו"ר מספינקא שליט"א וועט אונטערנעמען קיין ארץ הקודש, לפאר על ראש שמחתו ביי די שמחת החתונה פון א אייניקל, די כלה א טאכטער פון זיין איידעם הגה"צ ר' חיים מאיר האגער שליט"א, זון פון כ"ק אדמו"ר מוויזניץ שליט"א, מיט די חתן א זון פון הגה"צ אבד"ק ברעזאן שליט"א, נין ונכד לאדמור"י בית ספינקא, און לאנגיעריגער מרביץ תורה אין די ספינקא ישיבה, א זון פון הגה"צ אבד"ק אולם שליט"א, און איידעם ביי הגה"צ אבד"ק סטריזוב זאליזשא שליט"א.
דער רבי איז ערווארטעט ארויסצופארן קומענדיגן זונטאג ראש חודש תמוז, און באשיינען די מעמדי השמחה אנגעהויבן פון מאנטאג נאכט ביים חתן מאהל אין וויזניצע בית המדרש אויף רחוב שלמה המלך אין בני ברק, און דערנאך די שמחת החתונה דינסטאג אויפדערנאכט אין די גרויסע אודיטוריום אין שטאט אלעד.
דער רבי שליט"א וועט וויילן אין ארץ ישראל פון מאנטאג אינדערפרי ביז דאנערשטאג אויפדערנאכט, דורכאויס די פיר טעג וועט דער רבי דאווענען די תפילות און אויפנעמען קהל חסידיו לעצה ולברכה בהיכל בית מדרשו אויף רחוב רש"י אין בני ברק, מיטוואך אויפדערנאכט וועט דער רבי אפרעכטן די צענטראלע שבע ברכות צוגעשטעלט דורך קהילות ומוסדות ספינקא, בעיר התורה והחסידות בני ברק.
אין די זעלבע צייט גרייט מען זיך בהכנה דרבה בחצר הקודש וויזניץ מיט די לעצטע הכנות לקראת די גרויסע שמחה, היינט נאכט וועט כ"ק אדמו"ר מוויזניץ שליט"א אנקומען אויף א תפילת רבים ביים כותל המערבי, די שבת אויפרוף וועט פארקומען אין היכל ישיבת שומרי אמונים אין ירושלים, מוצאי שבת קודש וועט פארקומען א גרויסע פארשפיל אין ביהמ"ד הגדול וויזניץ אין בני ברק, מאנטאג נאכמיטאג וועט פארקומען די ארומע סעודה אין ביהמ"ד הגדול, אינאיינעם מיט די ראש חודש טיש.
די מעמד קבלת פנים ביום החופה וועט פארקומען אין ביהמ"ד הגדול וויזניץ, און די מעמד החופה על פני רחוב עזרא, און דערנאך וועט זיין צוגעשטעלט באסעס פארן גאנצן ציבור צו פארן צום שמחת החתונה אין אלעד. שבת שבע ברכות וועט פארקומען בחצר הקודש וויזניץ, און די לעצטע שבע ברכות וועט פארקומען דינסטאג פרשת בלק.
