ווי אין די לעצטע פאר יאר טוט כ"ק אדמו"ר מסאדיגורא שליט"א ווידער אונטערנעמען א נסיעה קיין אמעריקע מחזק צו זיין קהל עדת צאן מרעיתו בארצות הברית, און פראווענען א געהויבענע שבת אינאיינעם מיט די חסידים אין סאדיגורא בית המדרש אין לעיקוואד.
אנדערש ווי די ארגינעלע פלאן איז דער רבי ארויסגעפארן פון ארץ ישראל היינט מיטאג, און איז ערווארטעט צו לאנדן אין ניו יארק ארום זעקס אזייגער פארנאכטס. פון לופטפעלד וועט דער רבי אריינפארן קיין בארא פארק אויף תפילת מעריב, און שפעטער ביינאכט זיך באטייליגן ביי די שמחת השבע ברכות בחצרות וויזניץ – קאלוב – אמשינאוו ארה"ב, וואס קומט פאר אין ביהמ"ד אמשינאוו אין בארא פארק, וואו דער רבי שליט"א איז א נאנטער קרוב מצד החתן.
דערנאך וועט דער רבי ארויספארן קיין לעיקוואד און זיך דארט אויפהאלטן אין לויף פון די ימי הביקור. מארגן דאנערשטאג ביינאכט וועט פארקומען א מעמד קבלת פנים לכבודו אין ביהמ"ד סאדיגורא, וואו די חסידים וועלן האבן די געלעגנהייט אריבערצוגיין שלום נעמען ביים גרויסן גאסט.
