גרויס פרייד מיט הרחבת גבולי הקדושה נעמט ארום תלמידי וחסידי מונקאטש, און די פילע עלטערן פון ישיבה ותלמוד תורה מונקאטש אין מאנסי, ווען מען לעבט מיט פרייליכע מאמענטן ורוח הקודש אומרת כן ירבו, מיטן אויפבוי פון צוויי נייע בנינים אדירים לה' ולתורתו, א בנין פאר די ישבה יודעי בינה מונקאטש אין מאנסי, און א בנין פאר די תלמוד תורה תפארת בנים מונקאטש אין מאנסי.
די פריידיגע טריט קומט א שיינע פאר יאר זינט די התייסדות המוסדות, ווען סיי די תלמוד תורה און סיי די ישיבה גייען אן ב"ה מיט גרויס הצלחה, מיט הונדערטער תלמידים וואס זיצן און לערנען מיט גרויס יגיעה, און זענען זיך משלים בתורה וחסידות, תחת דגלו והדרכתו פון כ"ק אדמו"ר ממונקאטש שליט"א וואס עינו ולבו שם כל הימים.
מיט די שטארקע ענגשאפט בין כותלי המוסדות, ווען די ישיבה און די תלמוד תורה זענען ביז היינט איינקוואטירט אין געדונגענע לאקאלן, האט די הנהלת המוסדות באשלאסן אריינצושפרינגען אין מאסיווע פראיעקטן צו מרחיב זיין די גבולי הקדושה, און אויפבויען נייע בנינים וואס זאלן פארוואנדלט ווערן אלס פעסטע קביעות'דיגע אכסניות פאר די ישיבה און די חדר.
אין די עירמאונט געגנט אין מאנסי האט די הנהלת המוסדות געקויפט צוויי באזונדערע שטחים, וואו עס וועט בעז"ה ווערן אויפגעבויעט די נייע בנינים, בנין ישיבת יודעי בינה מונקאטש, און בנין תלמוד תורה תפארת בנים מונקאטש, און אצינד גרייט מען זיך צום פרייליכן מאמענט ווען עס וועט געלייגט ווערן די גרונדשטיין פאר די נייע בנינים, ברוב עם הדרת מלך.
די מעמד הנחת אבני הפינה איז באשטימט אויף קומענדיגן זונטאג פרשת חיי שרה הבעל"ט, און וועט פארקומען אויפן גרויסן שטח וואו עס ווערט געבויעט די נייע בנין הישיבה, א ריזן ציבור תלמידים חסידים און הורי המוסדות זענען ערווארטעט צו מיטהאלטן דעם מעמד גדול, און זיך פרייען אינאיינעם מיט די שטארקע דערגרייכונג, אין שפיץ פונעם נשיא המוסדות כ"ק אדמו"ר ממונקאטש שליט"א.
