א שרעקליכע חילול הקודש האט זיך אפגעשפילט היינט אין די היסטארישע שוהל אין שטאט סאדיגורא אין אוקראינע, דער הייליגער מקום קדוש וואס איז אויפגעשטעלט געווארן דורכ'ן הייליגן רוזינער זי"ע, און איז נתקדש געווארן בקדושה של מעלה דורך די הייליגע צדיקים לבית רוזין און סאדיגורא.
לויט די באריכטן פון די לאקאלע אינסטאנצן, איז א גייסטיש צורידערטע פארשוין אריינגעקומען אין די שוהל, פונקט ווען דער קביעות'דיגער שומר איז אוועקגעגאנגען פאר א קורצע צייט, ער האט אונטערגעצינדן די שוהל און אנגעברענגט א שרעקליכע חורבן, פאליציי און פייערלעשער זענען אנגעקומען שנעל און באוויזן אפצוהאלטן א פולער פייער רח"ל, דער פארשוין איז געווארן ארעסטירט, און לויט די אויספארשונגען האט ער שוין פרובירט איינמאל אונטערצוצינדן א שוהל אין די געגנט.
