יעצט ביינאכט אין ארץ ישראל קומט פאר א אינהאלטסרייכע ועידה פאר די צעירי האברכים בחצר הקודש סלאנים, אינערהאלב די מאסיווע קאמפיין אויפצוטרייבן די נויטיגע פאנדן לנצח אל מלאכת בית השם, ביים ריזן בוי פראיעקט צו פראכטפול איבערבויען און פארשענערן בית מדרשו של רבי, די סלאנימער בית המדרש אויף רחוב ברסלב אין בני ברק.
די פלענער האבן זיך אנגעהויבן רוקן ארום א האלבע יאר צוריק, נאך וואס כ"ק אדמו"ר מסלאנים שליט"א האט משמיע געווען אומצוויידייטיגע דברות קודש איבער די חוב קדוש וואס ליגט אויף יעדן חסיד ארויסצוהעלפן די עסקנים לפאר ולרומם את בית השם, ווען די היכל ביהמ"ד איז זייער נאכגעלאזט, שוין פאר לאנגע יארן וואס מען האט נישט גענומען קיין ערנסטע שריט אהערצושטעלן דעם בית המדרש אלס א געהעריגע אכסניא פאר די געהויבענע תפילות און טישן בצל הקודש פון רבי'ן.
פארלאפענע וואך מיטוואך איז פארגעקומען א ספעציעלע אסיפת עסקנים אין שפיץ פון כ"ק אדמו"ר מסלאנים שליט"א, און היינט אויפדערנאכט קומט פאר א גייסטרייכע מעמד פאר די צעירי האברכים, אין די פראכטפולע טאנטור זאל אין בית לחם, סמוך ונראה צום קבר רחל אמינו, וואו א רייכע פראגראם טוט אנטפאנגען די משתתפים, וואס שליסן זיך אן מיט גרויסע סכומים, און טוען ערהאלטן מידי קודש פונעם רבי'ן שליט"א א געבענטשע גארטל.
די בית המדרש ווערט פראכטפול איבערגעבויעט, אין א ספעציעלע דעזיין וואס איז געווארן אויסגעקליבן דורך די חסידים זעלבסט, נאך וואס די וועד הפועל פון די בוי פראיעקט האט ארויסגעשטעלט צום ציבור עטליכע מאדעלן צו הערן דעם דעת הקהל.
