בחצר הקודש סלאנים איז געמאלדן געווארן היסטארישע נייעס, אז צום ערשטן מאל וועט כ"ק אדמו"ר מסלאנים שליט"א פראווענען א ספעציעלע שבת אינאיינעם מיט נגידים ותומכים, די חסידים וואס שליסן זיך אן מיט גאר גרויסע סכומים צום גרויסן פראיעקט צו פארברייטערן און פארשענערן די סלאנימער בית המדרש אין בני ברק, דעם רבינ'ס שטיבל בעיר מושבו.
ווי באריכטעט דא אין די נייעס בעפאר יו"ט שבועות, איז אונטערגענומען געווארן א מאסיווע פראיעקט אין סלאנים צו אויפבויען און פארברייטערן די צענטראלע בית המדרש פונעם רבי'ן אויף רחוב ברסלב אין בני ברק, ספעציעלע מעמדים איז פארגעקומען פאר די אינגעלייט און בעלי בתים וואו אלע האב זיך אונטערגענומען גרויסע סכומים צונויפצוברענגען די פינאנציעלע געברויך צו פאראויסרוקן דעם בוי פראיעקט.
אצינד גרייט מען זיך אויף א היסטארישע שבת, ווען צום ערשטן מאל אין היסטאריע וועט דער רבי ארויספארן מחוץ לעיר פראווענען א געלט שבת, עס וועט פארקומען דעם קומענדיגן שבת קודש פרשת קרח ראש חודש תמוז, אין די פראכטפולע קאמפלעקס אין מושב בית האלה נישט ווייט פון בית שמש.
אלע חסידים וואס שליסן זיך אן מיט דרייסיג טויזענט שקל וועלן האבן די געלעגנהייט מיטצוהאלטן דעם גייסטרייכן שבת, און די וואס שליסן זיך אן מיט פינף און פערציג טויזענט שקל, וועלן האבן די זכיה ארויסצופארן אויף א נסיעה מיטן רבי'ן קיין אייראפע, צו פוקד זיין די קברי אבות ביי די הייליגע סלאנימער רבי'ס לדורותיהם.
