שטייענדיג א גאנצע יאר זינט כ"ק אדמו"ר מסלאנים שליט"א האט געגרינדעט די סלאנימער תלמוד תורה אין בית שמש, גרייט מען זיך אצינד צו פייערן די מעמד הנחת אבן הפינה פאר די נייע בנין וואס וועט געבויעט ווערן פארן געברויך פון די טייערע תינוקות של בית רבן.
דער סלאנימער רבי האט מיט איבער א יאר צוריק געגרינדעט די ערשטע חדר פאר די קהילה, אינעם עיר ואם בישראל בית שמש וואו עס איז פארהאן א גרויסע אנוועזנהייט פון סלאנימער חסידים, דערווייל איז די חדר פלאצירט אין צייטווייליגע קאראוואנען, און אצינד גרייט מען זיך שוין ב"ה אויפצובויען א אייגענע בנין לשם ולתפארת, וואס וועט צוברענגען פיל הרחבת הדעת פאר די תלמידים יקרים.
די גרויסע מעמד הנחת אבן הפינה וועט פארקומען קומענדיגן זונטאג פרשת מקץ, אינעם גרויסן בית המדרש דחסידי וויזניץ אויף רחוב רבי יהושע אין די רמה בית שמש ב' געגנט אין קרית הרמ"א, אלס נואם הכבוד וועט אויפטרעטן הגה"צ המפורסם ר' מאיר צוויבל שליט"א רב ביהמ"ד קדושת יום טוב ד'סאטמאר אין וויליאמסבורג, וועלכער שטייט אין שפיץ פון די וועד קרן הבנין צו באגלייטן די הרחבת גבולי הקדושה פונדערנאנט.
