ווי יאר יערליך וועט כ"ק אדמו"ר מסלאנים שליט"א אונטערנעמען א מסע הקודש קיין ניו יארק מחזק צו זיין קהל עדת צאן מרעיתו, די יעצטיגע נסיעה איז דעזיגנירט פאר די חסידים תושבי בארא פארק, וואו דער רבי שליט"א וועט פראווענען א געהויבענע שבת ברוב עם הדרת מלך, אינעם גרויסן בנין פון תלמוד תורה ראחמיסטריווקא אויף די זיבן און דרייסיגסטע סטריט.
דער רבי שליט"א וועט זיך ארויסלאזן אין וועג קומענדיגן זונטאג פרשת יתרו י"א שבט, באלד ביים אנקומען וועט דער רבי צופארן לבית האכסניא אין בארא פארק, און דורכאויס די ימי הביקור וועלן די תפילות פארקומען אין סלאנימער בית המדרש אין בארא פארק. מאנטאג אויפדערנאכט וועט פארקומען א מעמד קבלת פנים אין ביהמ"ד לכבודו פונעם רבי'ן, אינאיינעם מיט די יארצייט טיש לרגל די יומא דהילולא קדישא פון הרה"ק הסבא קדישא מלעכאוויטש זי"ע.
דאנערשטאג אינדערפרי נאך תפילת שחרית, וועט פארקומען א מסיבת לחיים און פירות טיש לכבוד חמשה עשר בשבט, שבת קודש פרשת יתרו וועט ווי דערמאנט געפראוועט ווערן א גרויסע שבת אינאיינעם מיט הונדערטער סלאנימער חסידים פון איבער גרעיטער ניו יארק און ניו דזשערזי, די תפילות און טישן וועלן פארקומען אין היכל ביהמ"ד פון די ראחמיסטריווקא חדר ווי דערמאנט.
זונטאג אויפדערנאכט וועט דער רבי שליט"א אפרעכטן א יארצייט טיש לרגל די יומא דהילולא קדישא פונעם הייליגן דברי שמואל פון סלאנים זי"ע, און מאנטאג איידער דער רבי לאזט זיך ארויס אויפן וועג צוריק קיין ארץ ישראל, וועט פארקומען א מעמד צאתכם לשלום וואו די חסידים וועלן זיך געזעגענען.
