אין ברוקלין בארא האל איז פארגעקומען די איינשווערונגס צערעמאניע, וואו א אידישער ריכטער איז איינגעשוואוירן געווארן צו דינען אלס ריכטער אין דעם ניו יארק סטעיט סופרים קאורט אין ברוקלין.
דער אידישער ריכטער, עדעם פערלמוטער האט שוין א צוויי און צוואנציג יעריגע היסטאריע אלס ריכטער אין קרימינאלע קאורט אין קינגס קאונטי, ניו יארק. מיט א יאר צוריק איז ער געווארן אויסגעקליבן אלס קאנדידאט פאר דעם ניו יארק סטעיט סופרים קאורט אינעם קרימינאלן געביט, און נאך וואס ער האט געוואונען די וואלן איז ער נעכטן געווארן איינגעשוואוירן אויפן אמט.
פערלמוטער איז באקאנט מיט זיין שארפן און שנעלן אידישן קאפ. זיינע געריכט קאלעגעס ווייסן צו זאגן אויף זיין קלוגשאפט און קלארע מיינונג. בעפאר ער איז אריין אויפ'ן אמט האט ער גרינטליך דורכגעלערנט די גמרות אין מסכתות סנהדרין און מכות, אינאיינעם מיט זיין געטרייען חברותא מיט הנגיד המפואר ר' אהרן נאה הי"ו, מיט וועם ער האט דורכגעלערנט אין א שיעור די אלע הלכות מיט די מפרשים בעמקות וואס האבן א שייכות מיט אורטיילן און סיי וועלכע געריכט אנגעלעגנהייטן, ארויסצוהאבן די קלארע דעת תורה וויאזוי זיך צו פירן אין פילע אומשטענדן.
ספעציעל שיינט עס ארויס אין די יעצטיגע טעג פון פרשת משפטים, ווי עס שטייט אין רש"י "לפניהם ולא לפני עובדי כוכבים", ווען עס ווערט געגעבן די געלעגנהייט צו הערן אן אורטייל פון א איד וואס פארמאגט אויך די דעת תורה
עס איז אינטערעסאנט אנצומערקן אז ביי דער איינשווערונגס צערעמאניע האט פערלמוטער געהאלטן א חומש אין זיין האנט.
