אין די יעצטיגע טעג איז געמאלדן געווארן בחצר הקודש בורשטין, די פלענער פון די מסע הקודש וואס כ"ק אדמו"ר מבורשטין שליט"א נעמט אונטער צו די קברי צדיקים אין אייראפע, שטייענדיג ביים גרויסן דערגרייכונג "יובל החמישים", גאנצע פופציג יאר זינט די התייסדות הקהילה, און שטייענדיג בעפאר עטליכע שמחות במעון קדשו וואס קומט פאר נאך יו"ט שבועות הבעל"ט.
דער רבי שליט"א איז ערווארטעט ארויסצופארן קיין אייראפע אין גענוי א וואך פון היינט, מיטוואך פרשת בהר בחוקותי א טאג נאך ל"ג בעומר, און צום הויכפונקט וועט געפראוועט ווערן א געהויבענער שבת אין שטאט צאנז, סמוך ונראה צום ציון הק' פונעם הייליגן צאנזער רב הרה"ק בעל דברי חיים זי"ע, די תפילות וועלן געפראוועט ווערן אין די היסטארישע שוהל וואו דער הייליגער צאנזער רב זי"ע האט אפגעראכטן די עבודת הקודש, און די טישן און סעודות שבת וועלן פארקומען אינעם בנין פון בוני צאנז.
ווי ערווענט וועט דער רבי ארויספארן פון בארא פארק קומענדיגע וואך מיטוואך פרשת בהר בחוקותי, און דאנערשטאג אינדערפרי וועט מען לאנדן אין ווארשא, בעפאר מען וועט מתפלל זיין ביי די קברי צדיקים אין שטאט מאגלניץ, אין קאזניץ, אין לובלין, אין לאנצוהט, און אין ליזענסק ביים ציון הק' פונעם הייליגן רבי'ן ר' אלימלך זי"ע.
פרייטאג אינדערפרי וועט דער רבי פוקד זיין די קברי צדיקים אין שטאט רימנוב און צאנז, און שבת קודש וועט געפראוועט ווערן אין שטאט צאנז ווי דערמאנט. זונטאג וועט מען מתפלל זיין ביי די קברי צדיקים אין קראקא, און דערנאך וועט מען זיך ארויסלאזן אויפן וועג צוריק אהיים קיין ניו יארק.
