אינעם עיר ואם בישראל בארא פארק גרייט מען זיך אויף א געהויבענע שבת בצל הקודש פון כ"ק אדמו"ר מסערט וויזניץ שליט"א, ווען דער רבי שליט"א נעמט אונטער די וואך א מסע הקודש קיין אמעריקע צו באשיינען די שמחות ביי עטליכע חסידים, און וועט פראווענען א געהויבענע שבת בקרב חסידיו אין בארא פארק.
דער רבי שליט"א איז ערווארטעט צו לאנדן אין ניו יארק דעם קומענדיגן מיטוואך פרשת לך לך, און וועט פארבלייבן דאהי פאר א וואך צייט, צו באשיינען עטליכע חתונות ביי די חסידים, דורכאויס די וואך וועט דער רבי דאווענען די תפילות בבית מדרשו קהל מקור ברוך סערט וויזניץ אויף די דרייצנטע עוועניו, און אויפנעמען די חסידים מיט קוויטלעך להיפקד בדבר ישועה ורחמים.
אין לויף פון די לעצטע צען יאר זינט דער רבי איז נתעלה געווארן בכתר האדמורו"ת, האט דער רבי געפראוועט בלויז איין שבת אין שטאט בארא פארק, מיט צוויי יאר צוריק אינמיטן די זוממער סעזאן, בהיכל בית מדרשו וואס האט נאר געקענט ארייננעמען די חסידים תושבי העיר, אצינד וועט דער רבי שליט"א צום ערשטן מאל פראווענען א גרויסע שבת ברוב עם הדרת מלך, בבית מדרשו פון זיין איידעם כ"ק אדמו"ר מקאסוב שליט"א מחשובי האדמורי"ם אין שטאט.
דער קאסובער רבי שליט"א האט איינגעלאדנט דעם שווער דער סערט וויזניצער רבי שליט"א צו פראווענען דעם שבת בבית מדרשו, וואוסענדיג אז אין ביהמ"ד סערט וויזניץ איז נישטא געהעריג קיין פלאץ פאר א גרויסע ציבור, דער רבי האט טאקע אנגענומען דעם איינלאדענונג און וועט פראווענען דעם גאנצן שבת מבואו ועד צאתו אין ביהמ"ד קאסוב, די טיש פרייטאג צונאכטס און שלש סעודות וואו עס וועלן אנטייל נעמען א גרויסע ציבור תושבי העיר.
