חסידי גור ברבבותיהם טוען זיך פארזאמלען היינט אויף מניני תהלים אין אלע בתי מדרשים ברחבי תבל, נאך וואס הרבנית הצדיקת מגור תליט"א, מחברתו הטהורה פון כ"ק אדמו"ר מגור שליט"א, געפונט זיך אין שפיטאל אין א ערנסטע געזונט צושטאנד, און איז אנגעוויזן אויף רחמי שמים.
די רעבעצין תליט"א איז היינט פארטאגס אריינגעפירט געווארן צו די הדסה שפיטאל אין ירושלים, און איז אריינגענומען געווארן אין די עמערדזשענסי אפטיילונג צוליב א גאר שווערע לונגען אנטצינדונג, וואס קען גאר שטארק אויסטרעפן אויפן געזונט צושטאנד, נאך וואס די רעבעצין איז נישט אזוי געזונט די לעצטע פאר יאר.
כ"ק אדמו"ר מגור שליט"א איז היינט פארמיטאג ארויסגעפארן צו די הדסה שפיטאל מבקר חולה זיין ביי די רעבעצין, און דורכשמועסן מיט די אנוועזנדע דאקטוירים איבער די מעדיצינישע באהאנדלונגען. אזוי אויך האט דעם רבינ'ס זון הגה"צ ר' נחמיה אלתר שליט"א, זיך שנעל ארויסגעלאזט אויפן וועג צוריק קיין ארץ ישראל, נאכן וויילן די לעצטע פאר טעג בקרב חסידי גור אין ארץ ישראל, זייענדיג דער וואס איז אין שטענדיגע פארבינדונג מיט די ארטיגע דאקטוירים איבער די מצב הבריאות פון די רעבעצין לרפואה שלימה.
אויפן וועג אהיים פון שפיטאל, איז כ"ק אדמו"ר מגור שליט"א אנגעקומען אויף א תפילה ביים ציון הק' פון אדמור"י בית גור צו מתפלל זיין פאר די רעבעצינ'ס געזונט, און בהוראת הקודש איז באשטימט געווארן אז נאך תפילת מנחה, סיי היינט און סיי מארגן, זאלן אלע חסידים אויסזאגן ספר רביעי שבתהלים מיט א כח הרבים, און זאגן די יהי רצון וי"ג מידות לעורר רחמים, אויף הרבנית שושנה רייזל בילא בת מינדל קילא לרפואה שלימה, בתוך שאר חולי ישראל.
