פאר לאנגע שעות מיט גרויס עקסטאז האבן טויזענטער חסידים זיך מיטגעפריידט בשמחתו הגדולה פון כ"ק אדמו"ר מסאטמאר שליט"א, וועלכער האט אין א מזל'דיגע שעה באגלייט צום חופה זיין עלטסטן אור אייניקל, און איז מיטגעהאלטן געווארן דורך טויזענטער חסידים פון נאנט און ווייט מיט גרויס שמחה וחדוה.
עס איז געגאנגען אונטער די חופה החתן המופלג אלטר יצחק נ"י זון פון הגה"צ ר' יעקב שלמה פאנעט שליט"א אבד"ק שערי תפילה אין קרית יואל, זון פון כ"ק אדמו"ר מקארלסבורג מאנטריאל שליט"א, און איידעם ביי הגה"צ ר' יהושע העשיל וואגשאהל שליט"א אבד"ק יאסלא, איידעם ביי הגה"צ ר' מנשה מאיער שליט"א גאב"ד גרינוויל. מיט די כלה א טאכטער פון הגה"צ ר' יואל גלאנץ שליט"א מו"ץ בק"ק סאטמאר וומס"ב, זון פון הגה"צ ר' יחזקאל גלאנץ שליט"א אבד"ק בארדיוב, און איידעם ביי הגה"צ אבד"ק סאטמאר וומס"ב שליט"א, בנו הגדול פון כ"ק אדמו"ר מסאטמאר שליט"א, און איידעם ביי הגה"צ גאב"ד סאטמאר ב"פ שליט"א.
די שמחה האט זיך שוין אנגעהויבן שבת פרשת ויצא ביים שמחת האויפרוף אין ביהמ"ד שערי תפילה אין קרית יואל, און ערב שבת פארן זמן הדלקת הנרות האט דער רבי שליט"א אנגעטון דעם שטריימל פארן חתן בביתו נאוה קודש. מיטוואך וישלח א טאג בעפאר די חתונה האט דער רבי שליט"א מתפלל געווען ביים ציון הק' פון צדיקי בית סאטמאר אויפן בית החיים אין קרית יואל כנהוג בעפאר א שמחה.
דאנערשטאג וישלח איז פארגעקומען די גרויסע חתונה, צוערשט אין ביהמ"ד הגדול דקהל יטב לב ד'סאטמאר אויף הופפער סטריט אין וויליאמסבורג, וואו עס איז אפגעראכטן געווארן די מעמד קבלת פנים בהתעוררות רב, די מעמד החופה פארנט פון ביהמ"ד, און די סעודת החתונה פאר די טויזענטער חסידים אין שפיץ פון די חשובע זיידעס הרבנים שליט"א.
ביים מעמד קבלת פנים האבן זיך משתתף געווען כ"ק האדמורי"ם מדושינסקיא, וויזניץ פון וומס"ב און ראחמיסטריווקא פון וומס"ב שליט"א, בדחנא דמלכא הרב מרדכי דוד עסטרייכער הי"ו האט אויפגעטרעטן מיט גראמען און דברי כיבושין, און דער רבי האט געוואונטשן לחיים און אויפגעטרעטן מיט דברות קודש.
ביים מעמד החופה איז מכובד געווארן מיט סידור קידושין דער עלטער זיידע פון כלה הגה"צ גאב"ד סאטמאר ב"פ שליט"א, קריאת הכתובה דער זיידע הגה"צ אבד"ק בארדיוב שליט"א, די ערשטע זעקס ברכות דער עלטער זיידע פון חתן הגה"צ גאב"ד גרינוויל שליט"א, און ברכה אחריתא דער זיידע פון חתן כ"ק אדמו"ר מקארלסבורג מאנטריאל שליט"א.
דערנאך איז געווען צוגעשטעלט די סעודת החתונה אין ביהמ"ד הגדול, און דאן האבן א פלאטע פון צענדליגע באסעס געפירט דעם ציבור צו די גיגאנטישע גרינהאוז קאמפלעקס אין די נעיווי יארד, וואו די ריזן זאל איז בליץ שנעל געווארן איבערגעפולט מיט טויזענטער חסידים ואנשי מעשה.
פאר עטליכע שעה נאכאנאנד האבן די טויזענטער חסידים זיך געהויבן בריקודין ווען דער רבי שליט"א בראש המסובים הייבט דעם ציבור מיט גרויס שמחה. צווישן די פילע משתתפים האט זיך אנגעזעהן דער עלטער עלטער פעטער כ"ק אדמו"ר מוויזניץ שליט"א פון מאנסי, און כ"ק אדמו"ר מוויזניץ שליט"א פון לאנדאן וועלכער איז געווען צוגאסט אין ניו יארק, אזוי אויך האבן זיך באטייליגט האדמורי"ם מגאלאנטא, מאשלוי, דעעש, בני האדמורי"ם מסקווירא, וויזניץ, באבוב, מאחנובקא בעלזא, און נאך פילע רבנים ודיינים.
צום הויכפונקט איז מען צוגעטרעטן צום מעמד המצוה טאנץ, ווען הרב מרדכי דוד עסטרייכער הי"ו האט צוערשט אויפגערופן דעם געהויבענעם בעל שמחה עלטער זיידע פון כלה כ"ק אדמו"ר מסאטמאר שליט"א. דער רבי האט אפגעראכטן די ריקודין מיט גרויס התלהבות כדרכו בקודש, זייענדיג מפזז ומכרכר ביים שמחה הגדולה צום דערגרייכונג פון א חתונה ביים פערטן דור.
דערנאך האבן געטאנצן מצוה טאנץ דער עלטער זיידע הגה"צ גאב"ד סאטמאר ב"פ שליט"א, דער עלטער זיידע הגה"צ גאב"ד גרינוויל שליט"א, דער זיידע הגה"צ אבד"ק סאטמאר וומס"ב שליט"א, דער זיידע כ"ק אדמו"ר מקארלסבורג מאנטריאל שליט"א, דער זיידע הגה"צ אבד"ק בארדיוב שליט"א, דער זיידע הגה"צ אבד"ק יאסלא שליט"א, דער אבי החתן און דער אבי הכלה.
די שמחה האט נאכגעפאלגט מיט א גרויסארטיגע שבת שבע ברכות אין ביהמ"ד הגדול סאטמאר אין וויליאמסבורג, ווען כ"ק אדמו"ר מסאטמאר שליט"א האט געפראוועט דעם גאנצן שבת בקרב חסידיו אין וויליאמסבורג, און אפגעראכטן די ריקודין קדישין נאכן טיש בליל שבת קודש.
זונטאג אויפדערנאכט איז פארגעקומען א גרויסע שבע ברכות אין ביהמ"ד הגדול אין קרית יואל, און די לעצטע שבע ברכות דאנערשטאג מיטאג וועט געפראוועט ווערן אינעם היכל המתיבתא אין קרית יואל, אינאיינעם מיטן סעודת הודאה כ"א כסלו, יום הצלה והשחרור פון הרה"ק מסאטמאר זי"ע.
