היינט איז באשטעטיגט געווארן אז כ"ק אדמו"ר מטאהש שליט"א וועט פראווענען איינער פון די נעכט די מעמד הדלקת נרות חנוכה אינעם עיר ואם בישראל מאנסי, נאך וואס דער רבי שליט"א קומט צו פארן קיין ניו יארק לפאר על ראש שמחתו, צו באשיינען די שמחת התנאים פון א אייניקל.
מיט עטליכע יאר צוריק האט דער רבי שוין געפראוועט א גרויסע מעמד הדלקת נרות חנוכה אין אמעריקע, ווען הונדערטער תלמידי וחסידי טאהש האבן זיך פארזאמלט אין א ספעציעל אפגעדונגענע לאקאל אין ניו דזשערזי צו מיטהאלטן די מעמד נשגב כשהמלך בעיר. אצינד ווען דער רבי שליט"א וועט ווידער אנקומען קיין ניו יארק אינמיטן די ימי החנוכה, וועט דער רבי נאכאמאל פראווענען דאהי די מעמד הדלקת נרות חנוכה, אבער דאסמאל וועט עס פארקומען אין מאנסי וואו עס איז פארהאן א גרויסע ציבור תלמידי וחסידי טאהש.
די מעמד וועט פארקומען אויף א גרויסע פארנעם די צווייטע ליכטל חנוכה מאנטאג אויפדערנאכט, און א סוויטע עסקנים זענען איינגעשפאנט צו טרעפן א פאסיג ארט וואו אפצורעכטן דעם מעמד. באלד נאכן מעמד הדלקת נרות חנוכה וועט געפראוועט ווערן די שמחת התנאים פון א אייניקל ביים רבי'ן, די כלה א טאכטער פון זיין זון הגה"צ ר' חיים יחיאל אלטר סג"ל לאווי שליט"א, איידעם ביי הגה"צ ר' סיני וואגשאהל שליט"א מלאנצוהט, מיט די חתן א זון פון הגה"צ ר' חיים ארי' כהנא שליט"א אבד"ק זכרון אלימלך ספינקא מאנסי, איידעם ביי הגה"צ ר' זלמן לייב פילאפף שליט"א אבד"ק מכלל יופי וחבר ביד"ץ דקהל יטב לב ד'סאטמאר.
