ווי באריכטעט איז כ"ק אדמו"ר מוויזניץ שליט"א לרפואה שלימה אנגעקומען דעם אנהייב וואך קיין מינכען דייטשלאנד, וואו דער רבי איז אריבער דעם דינסטאג א מעדיצינישע פראצעדור צו היילן דעם רבי'ן פון די ביטערע מחלה ל"ע מיט וואס דער רבי מוטשעט זיך שוין א יאר און א האלב רח"ל.
די פראצעדור איז ב"ה אריבער מיט הצלחה, אבער טראץ וואס מען האט געהאפט אז דער רבי וועט נאך קענען אהיימפארן קיין ארץ ישראל אויף שבת, האבן די דאקטוירים געראטן אז דער רבי זאל פארבלייבן אונטער אבזערוואציע אין שפיטאל ביז היינט פרייטאג אינדערפרי.
וויבאלד עס איז שוין נישט געווען מעגליך אנצוקומען אהיים קיין ארץ ישראל נאך פאר שבת, איז געטוישט געווארן די פלענער דורכאויס די נאכט, און היינט פארמיטאג באלד נאכן באפרייט ווערן פון שפיטאל, איז דער רבי ארויסגעפארן קיין שווייץ, א נסיעה מיטן באן וואס געדויערט ארום דריי און א האלב שעה, און עטליכע שעה בעפאר כניסת השבת איז דער רבי אנגעקומען צו די קארעסטא האטעל אין דאוואס שווייץ, וואו דער רבי וועט זיך אויפהאלטן די קומענדיגע טעג אויף אפרוה.
אידישע קינדער זענען ווייטער מתפלל למען בריאותו השלימה פונעם רבי'ן, כ"ק מרן ישראל בן לאה אסתר בתוך שאר חולי ישראל, דער רבי זאל זיך ערהוילן און צוריקקומען צו די כוחות, און קענען פראווענען דעם יום טוב פסח זמן חירותינו בקרב חסידיו בנהירו עילאה.
