א שרעקליכע טראגעדיע האט פאסירט היינט אין שטאט קעשינאוו אין מאלדאווע, ווען א חשובער אינגערמאן פון ארץ ישראל איז געווען פארמישט אין א שווערן עקסידענט, און איז ליידער נפטר געווארן פון די שווערע וואונדן ה"י.
די רעדע איז פון האברך החשוב הרב עקיבא ראנד ע"ה מחשובי חסידי טשערנאביל אין ירושלים, ניין און צוואנציג יאר אלט, א זון פון הרב החסיד ר' מרדכי דוד ראנד הי"ו פון לאנדאן, און איידעם ביי הרה"ג ר' יוסף מרדכי ווייס שליט"א רב דקהל מחזיקי הדת אין ציריך שווייץ, זון פון הגה"צ גאב"ד מאנטריאל שליט"א.
ר' עקיבא איז אנגעקומען קיין מאלדאווע אינאיינעם מיט נאך פילע טשערנאבילער חסידים, אין ראם פון די מסע הקודש וואס כ"ק אדמו"ר מטשערנאביל שליט"א האט געזאלט אונטערנעמען היינט קיין מאלדאווע, צו פוקד זיין דעם ציון הק' פון זקינו הרה"ק רבי יחיאל מקרילאוויץ זי"ע, און איז למעשה געווארן אפגערופן די לעצטע מינוט צוליב א שוואכקייט ביים רבי'ן.
פארנדיג אין א קאר דארט אין מאלדאווע, איז דער אינגערמאן ליידער געווען פארמישט אין א שווערן עקסידענט, פון וואס ער איז טראגיש נפטר געווארן אויפן פלאץ רח"ל. לאקאלע עסקנים מיטן הילף פון די אלוועלטליכע זק"א אגענטור האבן זיך באלד אריינגעלאזט אין די עבודת הקודש צו פארזיכערן כבוד המת און ארויסהעלפן מיט אלס וואס פעלט זיך אויס, מיטן האפענונג אז ער זאל וואס שנעלער קענען געברענגט ווערט קיין ארץ ישראל לקבורה.
דער חשובער נפטר ר' עקיבא ע"ה איז געווען פון די חשובע גבאים אין טשערנאבילער בית המדרש אין ירושלים, ער לאזט א צובראכענע אלמנה און צוויי קליינע קינדערלעך יתומים ה"י.
ויה"ר שלא ישמע עוד שוד ושבר בגבולינו, ושנשמע ונתבשר בשורות טובות.
