היינט דינסטאג איז באשטעטיגט געווארן אז כ"ק אדמו"ר מסקולען שליט"א פון מאנסי וועט וויילן אויף דעם קומענדיגן שבת קודש אין שיכון סקווירא, און מיטהאלטן די תפילות און טישן בצל הקודש פון כ"ק אדמו"ר מסקווירא שליט"א.
ווי באקאנט איז פארהאן א גאר נאנטע קשר צווישן די הייליגע צדיקים לבית סקולען צום סקווירא הויף, אנגעהויבן נאך פון הרה"ק בעל נועם אליעזר מסקולען זי"ע וועלכער איז געקומען זיך מסתופף זיין בצל הקודש פון הרה"ק מסקווירא זי"ע, און ביי להבחל"ח בנו ממלא מקומו כ"ק אדמו"ר מסקווירא שליט"א, בנו ממלא מקומו הרה"ק בעל מאור ישראל מסקולען זי"ע פלעגט אויך קומען תמידין כסדרן, און ביז היינט די קינדער און אייניקלעך האדמורי"ם לבית סקולען וועלכע קומען כסדר זיך מסתופף זיין בצל הקודש פונעם סקווירא רבי'ן שליט"א אין פארשידענע געלעגנהייטן.
אצינד איז באשטעטיגט געווארן אז צום ערשטן מאל נאכן איבערנעמען די כתר האדמורו"ת, וועט כ"ק אדמו"ר מסקולען שליט"א פון מאנסי מיטהאלטן א גאנצע שבת בצל הקודש פון כ"ק אדמו"ר מסקווירא שליט"א, ווען דער רבי וועט ספעציעל קומען צו פארן אויף קומענדיגן שבת קודש פרשת מטות מסעי צו וויילן בצל הקודש. מטעם די עסקנים אין חצר הקודש סקווירא ווערט אצינד אויסגעארבעט די גענויע דעטאלן, צוצושטעלן א פאסיגע אכסניא כראוי וכיאות פארן חשובן גאסט.
אין די זעלבע צייט ווערט געפלאנט א ספעציעלע רייכע מסיבה וואו עס וועלן זיך צוזאמקומען א געקליבענע צאל נדיבים בעם אינערהאלב די סקווירא אימפעריע, וואס וועלן אויסשטרעקן א רעכטע האנט און צולייגן א פלייצע אוועקצושטעלן א פינאנציעלע יסוד פאר די מוסדות הקדושים חסד לאברהם אין קדימה, וואס כ"ק אדמו"ר מסקולען שליט"א פון מאנסי האט גענומען אויף זיינע פלייצעס צו ממשיך זיין די הייליגע ירושה פון אבותיו הקדושים.
