מארגן דינסטאג וועט כ"ק אדמו"ר מאלכסנדר שליט"א ארויספארן אויף א לענגערע נסיעה פון צען טעג קיין אייראפע, מיטן ציהל אויפצוטרייבן גרויסע סכומים לטובת די מאסיווע פראיעקט אויפצובויען די נייע ביהמ"ד הגדול דחסידי אלכסנדר אין בני ברק, די בוי פראיעקט וואס גייט אן אין פולן שוואונג לפאר ולרומם את בית ה'.
מיט עטליכע חדשים צוריק איז פארגעקומען א פראכטפולע מעמד פאר אלכסנדר חסידים אין ארץ ישראל, וועלכע האבן זיך אונטערגענומען גרויסע געלטער צו פינאנצירן דעם בוי פראיעקט. אנהייב חודש חשון איז דער רבי שליט"א אנגעקומען אויף א באזוך אין ניו יארק צו מזכה זיין די חסידים פון דאהי צו זיין שותפים אין דעם הרחבת גבולי הקדושה, און אצינד איז געקומען די רייע פאר די חסידים תושבי אייראפע, זיך אנצושליסן אין דעם פראיעקט פארן נייעם ביהמ"ד הגדול.
דער רבי שליט"א וועט ארויספארן מארגן דינסטאג וישלח אויפן וועג קיין לאנדאן, די ערשטע פאר טעג וועט דער רבי וויילן בקרב חסידיו אין די גאלדערסגרין געגנט, וואו עס וועט פארקומען מסיבות און באנקעטן בבתי נגידים ושועים. שבת קודש וועט דער רבי פראווענען אינאיינעם מיט די חסידים אין די גאלדערסגרין געגנט, וואו עס איז ערווארטעט א גרויסע ציבור מיטצוהאלטן די תפילות און טישן בצל הקודש.
זונטאג אויפדערנאכט וועט פארקומען א גרויסע מעמד "בית חיינו" אין די פראכטפולע זאל בבנין בנות ציון החדש, וואו דער רבי וועט משמיע זיין דברות קודש און אפנעמען נדבות הלב פון די חסידים תושבי העיר. א טאג דערויף וועט דער רבי פארזעצן די נסיעה קיין אנטווערפן, וואו עס וועט פארקומען א גרויסע מעמד "בית חיינו" דינסטאג נאכט אין זאל פון עטרת לאה.
אין לויף פון די וואך פון פרשת וישב וועט דער רבי האבן די אכסניא אין שטוב פון משפחת קליינפעלד שיחי' אין אנטווערפן, און די תפילות וועט דער רבי פראווענען בבית מדרשו אויף די איזאבעלעליי גאס. ענדע וואך פרשת וישב וועט זיך דער רבי שליט"א אומקערן אהיים למעון קדשו אין בני ברק.
אין די זעלבע צייט גרייט מען זיך שוין אויף נאך א נסיעה וואס כ"ק אדמו"ר מאלכסנדר שליט"א וועט אונטערנעמען קיין אייראפע, ווען דער רבי וועט ארויספארן אינאיינעם מיט די נדיבי קרן הבנין צו פוקד זיין די מקומות הקדושים אין פוילין, לקראת די יומא דהילולא קדישא פונעם הייליגן ישמח ישראל פון אלכסנדר זי"ע. די נסיעה וועט פארקומען ענדע חודש טבת, פון דאנערשטאג פרשת וארא ביז זונטאג פרשת בא.
