אלפי חסידי סקווירא זענען אונטערן טיפן רושם פון די געהויבענע און היסטארישע מעמדי קודש, ווען אין א מזל'דיגע שעה איז געפראוועט געווארן די מעמדי התייסדות הקריה, מעמד הנחת אבן הפינה פאר די נייע שטעטל "קרית סקווירא" אין בעטהעל ניו יארק, וואס געפונט זיך אין די קאנטרי געגנטער ארום א שעה און א פערטל פון שיכון סקווירא.
די נייע שטעטל האלט שוין טיף אינמיטן די ארבעט, צענדליגע הייזער שטייען שוין, און נאך הונדערטער זענען אין פאקטישע פלענער. די בניני המוסדות ווערן שוין געבויעט, די בנין ביהמ"ד הגדול האלט שוין היבש נאנט צו פארענדיגט ווערן, און אזוי אויך האט מען שוין אנגעהויבן בויען די מקוה טהרה פאר די נייע שטעטל.
דעם זונטאג איז געפראוועט געווארן די היסטארישע מעמד ההתייסדות, ווען כ"ק אדמו"ר מסקווירא שליט"א האט געגאסן די אבני הפינה פאר די בניני הקהילה והמוסדות, און געדאווענט די ערשטע תפילה אינעם נייעם מקום קדוש. די מעמד איז געווען געאייגענט פאר די נגידים ותומכים, וואס העלפן ארויס די אויפבוי פונעם נייעם שטעטל, וואס האט זיך געציילט איבער פינף הונדערט תומכים און נדיבים.
אין די פריע נאכמיטאג שעות איז דער רבי שליט"א אנגעקומען אויפן שטח פון די נייע שטעטל, צום ערשט האט דער רבי פארגעזאגט פרקי תהלים פאר איבער א שעה צייט, און די קינדער פון רבי'ן האבן געזאגט קדיש, דערנאך האט אויפגעטרעטן הרה"ג ר' אלכסנדר אויסטערליץ שליט"א מו"ץ בשיכון סקווירא, און דאן איז מען צוגעטרעטן צום הויכפונקט ווען דער רבי האט געגאסן די אבני הפינה, ווען די נדיבים בעם גיבן איבער פארן רבי'ן די טעפלעך פון צעמענט, און די הייליגע שטיינער פון שטאט סקווירא אינדערהיים.
דערנאך האט מען געדאווענט מנחה ברוב עם אין די נייע ביהמ"ד אין שטעטל, ווען דער רבי דינט אלס שליח ציבור, נאכדעם איז פארגעקומען א רייכע סעודה לרגל המאורע, וואו מען האט געהערט שיינע חרוזים דורך הרב ישראל אדלער הי"ו. הגה"צ ר' משה וואלפסאן שליט"א אבד"ק אמונת ישראל וועלכער האט זיך מטריח געווען טראץ זיין הויכן עלטער צו באשיינען די מעמד, האט אויפגעטרעטן מיט פאסיגע דיבורים, און דערנאך האט כ"ק אדמו"ר מסקווירא שליט"א משמיע געווען דברות קודש לכבוד די מעמד.
צום שלוס פונעם מעמד האט דער רבי שליט"א פארטיילט פאר די גרעסערע תומכים א פראכטפולע זילבערנע קערה לכבוד יום טוב פסח.
נאך וואס כ"ק אדמו"ר מסקווירא שליט"א האט אויסגעדרוקט רצון קדשו צו זיך מיטפרייען צוזאמען מיט אלע חסידים לרגל המאורע, איז צומארגנס מאנטאג פארגעקומען א באזונדערע מעמד חגיגה הגדולה לרגל די התייסדות, אינעם גרויסן ביהמ"ד אין שיכון סקווירא, במקהלות אלפי חסידי סקווירא פון נאנט און ווייט, צו אפגעבן א שבח והודאה אויף די געוואלדיגע חסדים און סייעתא דשמיא מיטן בויען די נייע שטעטל, ביים מעמד האט אויפגעטרעטן כ"ק אדמו"ר מסקולען מאנסי שליט"א, און פ אר לענגערע שעות האט מען זיך געהויבן אין פרייליכע ריקודים לרגל המאורע.
