הונדערטער איינוואוינער אין סקווירא שטעטל זענען נעכטן צופרי ארויסגעקומען ברחובה של עיר אויף א מלכות'דיגע אויפנאמע, ווען עס האט באזוכט אין שטעטל דער הויכגעשעצטער ספיקער אוו די האוז מייק דזשאנסאן, וועלכער איז דער דריטער מאכטפולער פערזאן אין די פאראייניגטע שטאטן.
ספיקער דזשאנסאן איז אנגעקומען קיין ראקלענד קאונטי, צו באשיינען א פאנדרעיזינג אווענט פאר זיין פריינט קאנגרעסמאן מייק לאולער וואס פארטרעט די היימישע געגנט אין מאנסי און שיכון סקווירא. אין ראם פון זיין באזוך איז ער אריין אל הקודש פנימה ביי כ"ק אדמו"ר מסקווירא שליט"א אפצונעמען ווארעמע וואונטשן, און אויסצודרוקן כבודה של מלכות ווי עס פאסט, איז אפגעראכטן געווארן א ספעציעלע אויפנאמע מיט די באטייליגונג פון הונדערטער חסידים זקנים עם נערים.
בביתו נאוה קודש פון כ"ק אדמו"ר מסקווירא שליט"א זענען די חשובע געסט געזעצט געווארן ביים רייך געדעקטע טיש, אינאיינעם מיטן רבי'ן און די קינדער, און עטליכע הויכראנגיגע עסקנים און פאליטיקאנטן. הרב זושא נאוועסעלער שליט"א פון לעיקוואד, נין ונכד לאדמור"י בית טשערנאביל, האט באגריסט די געסט מיט ווארעמע ווערטער, און דער סקווירא רבי האט גערעדט מיטן ספיקער איבער די גזירת החינוך אין ניו יארק.
אויפן וועג ארויס פון רבינ'ס שטוב האבן די סקווירא עסקנים ארומגעוויזן פארן ספיקער די אנגייענדע בוי ארבעט ביי די נייע פראכטפולע בנין ביהמ"ד הגדול אין שטעטל, און דערנאך זענען זיי אריינגעקומען צום אויפנאמע וואו עס זענען געווען פארזאמלט הונדערטער אידן יונג און אלט.
די אויפנאמע איז פארגעקומען אינעם גרויסן שאטער אין שטעטל, צוליב די אומדערטרעגליכע היצן אויפן גאס, הרב אהרן ארי' אייזענבערג הי"ו האט באגריסט די עהרנפולער גאסט מיט פאסיגע ווערטער, און דער ספיקער האט אויסגעדרוקט באגייסטערונג זעענדיג אזא שיינע פלאץ, הונדערטער קינדערלעך און בחורים וואס מאכן א גאר איידעלער רושם.
