איבערראשנדע נייעס ווערט היינט געמאלדן פאר טויזענטער חסידי סקווירא לענגאויס ניו יארק ניו דזשערזי ביזן ווייטן קאנאדע, איבער די בעפארשטייענדע ערשטמאליגע ביזנעס עקספאו פאר כלל חסידי סקווירא, אין וואס סקווירא חסידים וועלן האבן די געלעגנהייט זיך צוזאמצוקומען תחת קורת גג אחד, פארשטעלן היימישע ביזנעסער און מקיים זיין וחי אחיך עמך.
די מאסיווע פראיעקט ווערט אונטערגענומען דורך קהל צמח דוד ד'שיכון סקווירא, אין צוזאמענארבעט פון א פראפעסיאנאלע שטאב ביזנעסלייט פון נאנט און ווייט, טעטיגע עסקנים אין סקווירא הויף וואס זענען שטארק אקטיוו אין די ביזנעס וועלט, און ווילן ארויפהייבן דעם היימישן האנדל אויף א העכערע שטאפל, מיטן געבן די געלעגנהייט פאר סקווירא ביזנעסלייט זיך פארצושטעלן מיט זייער היימישע סערוויסעס.
די ערשטמאליגע עקספאו וועט פארקומען אנהייב ווינטער, דאנערשטאג פרשת תולדות, אין עטוואס מער ווי דריי חדשים ארום. די ריזן קאמפלעקס פון ראקלענד קאמיוניטי קאלעדזש "RCC" וועט פארוואנדלט ווערן אלס היימישע ביזנעס צענטער, און צו אנפירן דעם מאסיוון פראיעקט, איז אויפגענומען געווארן די געלונגענע טיעם פון טריפל בי קאארדינעישאנס, זייענדיג די ערשטע טריט אין וחי אחיך עמך, זייענדיג א סוקסעספולע סקווירא ביזנעס וואס האט שוין אהערגעשטעלט ריזיגע מעמדים אין די פארגאנגענהייט.
היינט מיטאג איז געמאלדן געווארן די ערשטע דעטאלן איבער די גרויסע ביזנעס עקספאו, מיט א ליסטע פון עסקנים וואס זענען עוסק דערין אויסצוארבעטן די גענויע דעטאלן, עטליכע עסקנים פון יעדע שטאט וואו עס איז פארהאן א קיבוץ פון חסידי סקווירא, צו זיכער מאכן אז יעדער איינער האט די מעגליכקייט צו געניסן פון דעם מאסיוון פראיעקט.
