נאכפאלגענדיג די לעצטיגע שערוריה אין די פעלד פון בדיקת סת"ם, האט כ"ק אדמו"ר מסקווירא שליט"א מייסד געווען א נייע וועד הרבנים לעניני סת"ם אינערהאלב בית דין צדק ד'שיכון סקווירא, וואס די דאזיגע רבנים זאלן שטיין על המשמר אויף אלעם אנבאלאנגט די ענין פון ספרי תורה תפילין ומזוזות, האלטן א קשר און געבן הדרכה און השגחה פאר די בודקים העוסקים במלאכת הקודש.
דער רבי האט געשטעלט אין שפיץ הגה"צ ר' יוסף ישראל אייזענבערגער שליט"א דומ"ץ שיכון סקווירא, ואתו עמו הרה"ג ר' יצחק שפיטצער שליט"א מו"ץ אין שטעטל און א סופר מומחה, הרה"ג ר' אברהם יצחק לונגער שליט"א מדייני הקהילה אין מאנסי, און הרה"ג ר' דוד אייזענבערגער שליט"א מו"ץ אין שטעטל.
געציילטע טעג נאכן התמנות איז פארגעקומען די ערשטע אסיפה אין שטוב פון הגה"צ ר' יוסף ישראל אייזענבערגער שליט"א, וואו עס זענען געלאדנט געווארן צוועלף בודקים מומחים וואס זענען עוסק אין דעם פעלד, און דער דיין האט פארברייטערט א שמועס איבער די געוואלדיגע אחריות און די וויכטיגע פונקטן ווען עס קומט צו בדיקת סת"ם.
