די התרגשות ביי אלפי חסידי סקווירא איבער די גאנצע וועלט איז גאר גרויס, שטייענדיג נאך די זעלטן געהויבענע מעמד פתיחת ההיכל ווען פארלאפענעם מוצאי שבת קודש צום ערשטן סליחות איז אין א מזל'דיגע שעה באנייעט געווארן די ריזן היכל בית המדרש הגדול והחדש אין שיכון סקווירא, שטייענדיג פינף און א האלב יאר זינט עס איז געלייגט געווארן די אבן הפינה במעמד אלפי חסידים ואנשי מעשה.
בהוראת הקודש פון כ"ק אדמו"ר מסקווירא שליט"א איז באשטימט געווארן א ספעציעלע סדר פאר די חנוכת הבית, צו באנייען דעם היכל מיט לימוד התורה א שעה ברציפות. האלב נאך עלף האט זיך אנגעהויבן די מעמד מיט א שעה רציפות, טראץ וואס יעדער האט געקענט לערנען מה שלבו חפץ, האט דער סקווירא רבי שליט"א געזאגט אז מען זאל אויך לערנען אביסל אינעם ספה"ק מאור עינים אויף עניני תפילה, צו געבן דעם ריכטיגן חסידישן הכנה לקראת די ערשטע תפילה אין די נייע שוהל.
צוועלף דרייסיג איז כ"ק אדמו"ר מסקווירא שליט"א ערשינען אינעם היכל הגדול אויף די בימת הכבוד ביים מזרח וואנט, צוערשט האט אויפגעטרעטן מיט א דרשה הרה"ג ר' סנדר אויסטערליץ שליט"א מדייני סקווירא, און דערנאך האט מען געהאט די זכיה צו הערן ברכת הקודש פונעם רבי'ן שליט"א לכל העם הנאספים פאר לענגערע מינוטן, וואו דער רבי האט שטארק מעורר געווען דעם ציבור בעניני תפילה און מורא מקדש. דערנאך האט דער רבי פארגעזאגט אכצן קאפיטלעך תהלים בהתעוררות רב, לחנך ולהכשיר דעם נייעם בית מקדש מעט מיט הייסע תפילות.
נאך אמירת תהלים האט מען געזאגט סליחות בהתעוררות רב, פארגעזאגט דורכ'ן קביעות'דיגער בעל תפילה הגה"צ ר' חיים מאיר טווערסקי שליט"א בנו הצעיר פונעם רבי'ן שליט"א, דערנאך האט דער רבי פארטיילט האניג לעקאך פאר אלע חסידים ווי איינגעפירט יאר יערליך.
מטעם קהילה קדושה צמח דוד אין שיכון סקווירא, איז נעכטן מאנטאג אויפדערנאכט פארגעקומען א מסיבת לחיים לרגל די חנוכת היכלי התפילה, מיטן ענדגילטיגן באנייאונג פון די דאווענען שטיבלעך אין די אונטערשטע שטאק. די לחיים איז פארגעקומען אין שפיץ פון די קינדער פון כ"ק אדמו"ר מסקווירא שליט"א, און שפעטער ביינאכט איז דער רבי שליט"א אנגעקומען אויף קביעת מזוזה ביי די אונטערשטע שטאק פון ביהמ"ד.
די אפיציעלע מעמד חנוכת הבית פארן בנין ביהמ"ד וועט פארקומען הערשט נאך א יאר, ווען די גאנצע בנין וועט באנייעט ווערן כלול בהדרו, וואס מען האפט אצינד צו זיין פערטיג ביז צום קומענדיגן יאר ראש השנה תשפ"ו.
