אלפי חסידי סקווירא זענען איינגעהילט בהתרגשות דקדושה, ווען דעם יו"ט איז געמאלדן געווארן אז די גרויסארטיגע און לאנג ערווארטעטע מעמד הכנסת ספר תורה פארן רבינ'ס ספר תורה וועט געפראוועט ווערן בקול אדיר וחזק ברוב פאר והדר נאך דעם ווינטער, ענדע חודש שבט הבעל"ט, אין די וואך פון פרשת תרומה בעפאר שבת שקלים.
סקווירא חסידים האבן נארוואס ארויסגעטרעטן פון א זעלטן געהויבענער יום טוב שמחת תורה אויף א היסטארישע פארנעם, ווען די לעבעדיגע הקפות איז געפראוועט געווארן בתוככי ביהמ"ד הגדול והחדש מיט גרויס הרחבת הדעת, שמחת תורה פארטאגס ביים טיש, האט דער משמש בקודש הרב דוד בערגער שליט"א אויפגעטרעטן מיט ווערטער איבער די גודל הזכות פון די קבלות טובות וואס די חסידים זענען זיך מקבל, און שאפט א גרויסע נחת רוח פארן רבי'ן שליט"א, דערביי האט ער אויסגערופן בשער בת רבים אז די גרויסע מעמד הכנסת ספר תורה וועט געפייערט ווערן דעם קומענדיגן פרשת תרומה בתוככי קרית מלך רב, און איבערגעגעבן אין נאמען פונעם רבי'ן אז עס וועט אים זיין א גרויס קורת רוח יעדער חסיד וואס וועט זיך באטייליגן.
ווי באקאנט שטייט מען שוין אצינד גאנצע זיבן יאר זינט די התחלת כתיבת ספר תורה, ווען דער סקווירא רבי שליט"א האט אנגעהויבן שרייבן דעם זעלטן מהודר'דיגע ספר תורה, אין צוזאמענארבעט מיט אלע חסידים זקנים עם נערים, אנשים נשים וטף, וועלכע האבן זוכה געווען אין א קנין נצחי אינעם רבינ'ס ספר תורה דורך די מערערע קבלות טובות אין לויף פון די יארן.
זונטאג פרשת תרומה וועט פארקומען די לעצטע שבע ברכות פון א אור אייניקל ביים רבי'ן, און אין די יעצטיגע טעג ווערט אויסגעארבעט די גענויע פלענער וועלכע טאג אין די וואך עס וועט פארקומען די גרויסע חגיגה בשלהבת אש קודש, לכבוד התורה ותפארתה.
