מיט בלויז געציילטע טעג פארבליבן גרייטן זיך טויזענטער חסידים מיטצוהאלטן די גרויסארטיגע רעבישע חתונה בחצרות הקודש סקווירא און וויזניץ, וואס וועט געפראוועט ווערן אויף א ריזן פארנעם אין די גיגאנטישע קאמפלעקס פון ראקלענד קאמיוניטי קאלעדזש "RCC", במקהלות אלפי חסידים ואנשי מעשה פון ביידע הויפן און נאך טויזענטער אידן פון נאנט און ווייט.

די חתן הרב אלעזר האגער איז א זון פון הגה"צ ר' יעקב יוסף האגער שליט"א, בנו הגדול פון כ"ק אדמו"ר מוויזניץ שליט"א פון מאנסי, און איידעם ביי זיין פעטער כ"ק אדמו"ר מסקווירא שליט"א. די כלה איז א טאכטער פון הגה"צ ר' פנחס שלום ראטטענבערג שליט"א אב"ד שירת הלוים קאסאן מאנסי, זון פון כ"ק אדמו"ר מקאסאני שליט"א, אייניקל פון הרה"ק בעל תורת מרדכי מוויזניץ זי"ע.

די גרויסע חתונה ברענגט אויף נאסטאלגישע געפילן ביי די עלטערע חסידים פון ביידע הויפן, סיי פון סקווירא און סיי פון וויזניץ, ווען בימים ההם מיט צענדליגע יארן צוריק איז פארגעקומען עטליכע רעבישע חתונות אין די הויפן אין אט דעם זאל פון ראקלענד קאמיוניטי קאלעדזש, אצינד ווערט אויפגעברענגט די אמאליגע שמחה ווען מען זיך ווידער מיטפרייען אינאיינעם צווישן די פיר ווענט פון דעם ריזן גיגאנטישן זאל, וואס איז ספעציעל ארויסגעדינגען געווארן צו קענען אקאמאדירן אזא ריזן ציבור פון ביידע גרויסע הויפן.

די גרויסע חתונה וועט פארקומען דעם קומענדיגן מאנטאג וירא י' חשון, די טעטיגע עסקנים פון ביידע הויפן זענען שוין וואכן לאנג אקטיוו אויסצוארבעטן אלע דעטאלן ארום די גרויסע חתונה אויף א ברידערליכע פארנעם, אין שפיץ פון די בארימטע YF פראדאקשענס אונטער די פירערשאפט פון העסקן הנמרץ ר' יוחי פליישמאן הי"ו וועלכער שטייט אין שפיץ פון אלע טעכנישע דעטאלן. הויכשטאקיגע פארענטשעס ווערט אויפגעשטעלט אינעם זאל מיט גענונ פלאץ פאר טויזענטער מענטשן אינגעלייט און בחורי חמד, הונדערטער טישן ווערן אויסגערישט פאר די סעודת החתונה, א באזונדערע זאל פאר די פרויען, און א הויכע חופה פלאטפארמע אין צענטער פון די קאמפלעקס.

ספעציעלע מאביל'ס ווערט אהערגעשטעלט נעבן די זאל, וואס וועט דינען אלס פריוואטע צימערן פאר די זיידעס כ"ק האדמורי"ם שליט"א דורכאויס די שמחת החתונה, און א געלונגענע שטאב פון צענדליגע אינגעלייט זענען איינגעשפאנט ארויסצוהעלפן און באגלייטן די גאנצע שמחה מהחל ועד כלה אז אלעס זאל קלאפן על צד היותר טוב.

לויטן פלאן וועט די זמנים פון קבלת פנים און חופה לויפן אויף די וויזניצע זייגער, די קבלת פנים וועט זיך אנהייבן אזוי פרי ווי א פערטל צו פיר, מען זאל קענען ארויסגיין צום חופה בעפאר די שקיעה. דער וויזניצער רבי וועט דאווענען מנחה פארן קבלת פנים אין זאל, און דערנאך ליינען די כוללות קוויטל פון די הונדערטער בחורי הישיבות כנהוג.

די זמנים פון די סעודת החתונה וועט לויפן אויף די סקווירא זייגער, ווען די זיידעס כ"ק האדמורי"ם שליט"א וועלן ערשיינען צום סעודת החתונה בעפאר מען פארטיילט די פלייש פאר די ציבור המשתתפים. דערנאך וועט מען זיך פרייען און טאנצן פאר לענגערע שעות בשמחתן של צדיקים, און שליסן די חתונה מיט די געהויבענע מצוה טאנץ בשלהבת אש קודש. דורכאויס די חתונה וועלן די מנגנים פון ביידע הויפן מהנה זיין בשירה וזמרה.

דעם שבת קודש וועט פארקומען די שמחת האויפרוף בחצר הקודש סקווירא, ווען דער גרויסער זיידע כ"ק אדמו"ר מוויזניץ שליט"א פון מאנסי וועט זיין צוגאסט אויף שבת אין סקווירא לכבוד די שמחה, אינאיינעם מיט א שיינע ציבור חסידים זקנים עם נערים. מטעם די וועד הכנסת אורחים אין שיכון סקווירא ווערט אלעס צוגעשטעלט אויפן שענסטן פארנעם, דער וויזניצער רבי וועט האבן די אכסניא אין שטוב פון הרה"ח ר' ראובן שמעון אויסטערליץ הי"ו, די טיש פרייטאג צונאכטס און שלש סעודות אויף א פריע און שנעלע פארנעם וועט ער פראווענען אין זאל אביר יעקב בבנין בית חינוך לבנות ד'שיכון סקווירא, און נאכן טיש בחצר הקודש סקווירא וועט ער פראווענען א באטע בבית האכסניא.

זונטאג נאכט וועט פארקומען די שמחת החתן מאהל אין ביהמ"ד הגדול אין שיכון סקווירא, די צענטראלע סקווירא שבע ברכות קומט פאר דאנערשטאג נאכט אין די גרויסע שאטער אין שיכון סקווירא במקהלות אלפי חסידי סקווירא, די לעצטע שבע ברכות וועט פארקומען אין היכל ביהמ"ד הגדול לבוש מרדכי אין שיכון וויזניץ מאנסי זונטאג פארנאכטס, און דינסטאג נאכט ממחרת החתונה וועט פארקומען די שבע ברכות אין ספינקא זאל אין בארא פארק, צוגעשטעלט דורכ'ן זיידן כ"ק אדמו"ר מקאסאני שליט"א.

שבת שבע ברכות וועט פארקומען אין די זאלן פון תפארת עלקא בבנין מוסדות וויזניץ אין מאנסי, צוגעשטעלט דורכ'ן מחותן הגה"צ אב"ד קאסאן מאנסי שליט"א, אין שפיץ פונעם זיידן כ"ק אדמו"ר מקאסאני שליט"א. לויטן פלאן וועט דער זיידע פון חתן כ"ק אדמו"ר מוויזניץ שליט"א פון מאנסי מיטהאלטן די שמחה בליל שבת קודש, און אפרעכטן די טיש ליל שבת קודש אין די גרויסע זאל פון תפארת עלקא במקהלות עם רב.