אלפי חסידי סקווירא לעבן מיט אצינד גאר פרייליכע טעג, מיט די שמחת החתונה פון חתן כלה אייניקלעך ביי כ"ק אדמו"ר מסקווירא שליט"א, וואס קומט פאר היינט אויפדערנאכט בקרית מלך רב אין שיכון סקווירא. די שמחת החתונה וועט באשיינט ווערן דורך טויזענטער חסידים וואס פרייען זיך מיט מיט די דאפלטע שמחה ביים רבי'ן אין הויף, צוויי חשובע מחותנים מפארי וחשובי המשפיעים און מרביצי תורה אין סקווירא שטעטל, דעם רבינ'ס זון הגה"צ ר' חיים מאיר טווערסקי שליט"א אבי הכלה, און דעם רבינ'ס אייניקל הרב לייבוש טייטלבוים שליט"א אבי הכלה, איידעם ביים רבינ'ס עלטסטן זון הגה"צ ר' אהרן מענדיל טווערסקי שליט"א.
איבערהויפט זעהט אן רגשי שמחה בחדוות התורה, ווען מען גרייט זיך צום גרויסארטיגן מעמד כבוד התורה "משולשת בתורה" וואס וועט פארקומען דעם קומענדיגן מוצאי שבת קודש במקהלות אלפי חסידים, ווען עס וועט אפגעראכטן ווערן פיר פרייליכע סיומים אין באזונדערע ראמען פון די סדרי הלימודים דחסידי סקווירא, די פרייליכע שבע ברכות במעון הקודש פונעם רבי'ן, און א מעמד חיזוק בקביעת עתים לתורה פאר כלל חסידי סקווירא.
די פראכטפולע מעמד וואס וועט פארקומען אין היכל ביהמ"ד הגדול אין שיכון סקווירא, ווערט אהערגעשטעלט דורך די עסקנים פון חברת "תורה ותפילה", וועלכע געבן זיך אפ מיט אלע אנגעלעגנהייטן איבער שיעורי תורה, און קביעת עתים לתורה בין גבולי השיכון. א רייכע סעודה ווערט צוגעגרייט כיד המלך לכבוד התורה און לכבוד די שמחה בבית צדיקים.
בראש המסובים וועט באשיינען דער ראש בית אב און דאפלטער בעל שמחה כ"ק אדמו"ר מסקווירא שליט"א, וועלכער וועט משמיע זיין דברות וברכות קודש לכל העם הנאספים, אלס נואם הכבוד וועט אויפטרעטן הגה"צ ר' פנחס חיים גרינוואלד שליט"א אבד"ק פאפא מאנסי, בן כ"ק אדמו"ר מפאפא שליט"א.
צום הויכפונקט פונעם מעמד וועט פארקומען די סיום מסכת נדרים וואס איז געלערנט געווארן אין ראם פון "עמוד יומי" דחסידי סקווירא, סיום מסכת בבא בתרא וואס איז געלערנט געווארן אין ראם פון "דף היומי", סיום מסכת שבת וואס איז געלערנט געווארן אין ראם פון "עמוד יומי" פון דרשו, און סיום ירושלמי סדר זרעים וואס איז געלערנט געווארן אין ראם פון "דרשו".
