זעלטענע נייעס הערט מען פון די עסקנים נמרצים אינערהאלב די וועד הקמת הבית פאר די נייע ביהמ"ד הגדול ד'שיכון סקווירא, אז מען גרייט זיך אויף א זעלטן היסטארישע מעמד מיטן נאמען "ירושת אבותי", וואו פילצאליגע נדיבי לב בוני ביהמ"ד החדש וועלן זיך צוזאמקומען תחת קורת גג אחד, און האבן די זעלטענע זכיה אז כ"ק אדמו"ר מסקווירא שליט"א וועט ווייזן פאר זיי די הייליגע חפצי ירושה וואס ליגט באוצרו הטוב פון די פריערדיגע צדיקים.
ווי באקאנט פארמאגט דער סקווירא רבי שליט"א א זעלטענע אוצר פון ירושה חפצים, פון די הייליגע זיידעס צדיקים וקדושים למעלה בקודש, ספרי קודש און בגדי שרד לשרת בקודש, תשמישי קדושה און אוצרות נפלאים כתבים ומכתבים, די אוצר ליגט באהאלטן בגנזי הקודש בביתו נאוה קודש פונעם רבי'ן, און בלויז איינמאל א יאר נעמט עס דער רבי ארויס ביים פסח'דיג מאכן, ווען געציילטע בחורים מצוינים מופלגים האבן די זכיה דאס מיטצוהאלטן.
אצינד ווען די בוי ארבעט אהערצושטעלן די נייע בית המדרש גייט ווייטער אן אין פולן שוואונג, און די הוצאות הבניה שטייגט נאכאנאנד מיט פרישע הוצאות, וואס ברויך דעקונג פון די קרן הבנין קאסע, איז געמאלדן געווארן איבער די היסטארישע ועידת התומכים וואס וועט פארקומען בעוד חודש ימים, און וועט זיין געווידמעט פאר די נדיבים ותומכים וואס וועלן איינצאלן ספעציעלע זעקס און צוואנציג טויזענט דאללער פאר דעם יעצטיגן מגבית.
די פראכטפולע מעמד מיטן נאמען "ירושת אבותי" וועט פארקומען זונטאג פרשת שמות י"ב טבת, אין א פראכטפולע זאל אין ניו דזשערזי, אין די צייט ווען כ"ק אדמו"ר מסקווירא שליט"א פארט ארויס אויפן וועג קיין קאליפארניע אויף אפרוה, און שטעלט זיך אפ אונטערוועגנס אין ניו דזשערזי צו מחזיק זיין בדרך כפי צוואת רבי יהודה החסיד.
די מעמד וועט זיין געאייגנט פאר די תומכים נכבדים און זייערע משפחות, מיט א גאר רייכע פראגראם צוגעגרייט, צום שפיץ וועט מען האבן די זכיה צו מקבל זיין את פני הקודש מיט די כלי הקודש, און דער רבי וועט צייגן די חפצי ירושה און דערציילן דערויף מקובל'דיגע סיפורים ועובדות פון די פריערדיגע צדיקים.
