דעם קומענדיגן זונטאג פרשת קרח הבעל"ט, וועט כ"ק אדמו"ר מסקווירא שליט"א ווי יאר יערליך ארויספארן קיין קאליפארניע וואו דער רבי וויילט אויף אפרוה פאר דריי וואכן יעדע האלבע יאר, דער רבי שליט"א וועט זיך אויפהאלטן אין א פריוואטע הויז אין קארמעל קאליפארניע, און שעפן פרישע כוחות לחיזוק בריאות גופו הטהור, איידער די צווייטע האלב זוממער ווען עס קומט פאר צוויי חתונות במעון הקודש, און די ימים טובים אין חודש תשרי הבאים לקראתינו לשלום.
אונטערוועגנס קיין קאליפארניע, וועט זיך דער רבי שליט"א אפשטעלן אין ראטשעסטער מינעסאוטע, אויף א פאראויס באשטימטע באזוך אין די מעיא קליניק, וואו דער רבי שליט"א איז אריבער א קאמפליצירטע אפעראציע אויפן הארץ מיט אכט יאר צוריק, זייענדיג שוין אויף די עלטערע יארן מיט אכט יאר פארביי, האבן די דאקטוירים געראטן דעם רבי'ן צו קומען אויף א אונטערזוכונג צו זיכער מאכן אז אלעס איז בסדר מיטן אויבערשטנס הילף.
דער רבי וועט ארויספארן פון ניו יארק זונטאג נאכט, און זיך אויפהאלטן אין ראטשעסטער ביז דינסטאג נאכמיטאג, אין א ספעציעל אהערגעשטעלטע האטעל אין די געגנט, די תפילות דורכאויס די צוויי טעג וועט דער רבי דאווענען אין די ארטיגע בית חב"ד מיט א ענגע מנין מקורבים וואס באגלייטן דעם רבי'ן אויף די נסיעה.
