ווי באריכטעט עטליכע וואכן צוריק, איז אונטערגענומען געווארן ערנסטע רענאוואציע ארבעט בביתו נאוה קודש פון כ"ק אדמו"ר מסקווירא שליט"א, וואו דורכאויס די דריי וואכן וואס דער רבי האט געוויילט אין קאליפארניע אויף אפרוה, האט מען גענצליך איבערגעבויעט די פראווע שטוב פונעם רבי'ן און די צימערן ארום, צוצוברענגען פיל מער הרחבת הדעת סיי פארן רבי'ן און סיי פארן גאנצן ציבור וואס קלאמערן זיך ביים רבינ'ס טיר אין יעדע געלעגנהייט.
נאכן פארענדיגן די ארבעט, האט מען צוריקגעברענגט די ארגינעלע מעבל וואס געפונט זיך דארט נאך פון די פריערדיגע יארן, בצל הקודש פון הרה"ק מסקווירא זי"ע, די ספרים שאפעס און אלעס ארום, וואס איז מקודש בקדושה של מעלה שוין לאנגע יארן. אזוי אויך האט מען פראכטפול איבערגעמאכט דעם רבינ'ס שטוהל מיט וואס דער רבי באנוצט זיך שוין צענדליגע יארן, וואס איז געקויפט געווארן און איז יעצט ווידער איבערגעמאכט געווארן בנדבתו פון הגה"צ רבי יוסף ישראל אייזענבערגער שליט"א דומ"ץ שיכון סקווירא.
פארגאנגענעם דאנערשטאג נאכן זיך אהיימקערן למעון קדשו, האט דער רבי שליט"א קובע געווען די מזוזות כדת וכדין, ווען ביים הויפט אריינגאנג צום פראווע שטוב האט דער רבי קובע געווען א ספעציעלע "קדשינו מזוזה", פון די הייליגע מזוזות וואס דער רבי פארטיילט פאר אלע חסידים וואס זענען זיך מקבל קבלות טובות בעניני טעכנעלאגיע און צניעות לאורך ימים ושנים טובים, ארויפברענגענדיג דעם ספעציעלן זכות מיט נאך א שטאפל, ווען דער רבי אליינס לייגט אויך דעם מזוזה אויף זיין פריוואטע שטוב.
